ye raaz-e-soz-e-mohabbat kabhi ayan na hua

ye rāz-e-soz-e-mohabbat kabhī ayaañ na huā

tamām ḳhāna-e-dil jal gayā dhuāñ na huā

kabhī na ḳhāna-e-dil meñ mire vo but aaya

makīn haif hai zīnat-dah-e-makāñ na huā

huā maiñ soz-e-tap-e-ġham se jal ke ḳhākistar

par is tarah se ki paidā zarā dhuāñ na huā

na but-kade meñ nazar aaya tū na ka.abe meñ

ḳharāb tere liye maiñ kahāñ kahāñ na huā

duī kā ham ne to dil se uThā diyā parda

hazār pardoñ meñ par vo sanam nihāñ na huā

habāb-vār hai bahr-e-jahāñ ke nashv-o-numā

na ho balā se agar qabr kā nishāñ na huā

safā-e-qalb se dekhā kiyā maiñ jalva-e-husn

hijāb māne-e-nazzāra-e-butāñ na huā

milāyā ḳhaak meñ jis ko faroġh par dekhā

sitam-shi.ār koī tujh sā āsmāñ na huā

ye kis ke bār-e-alam ne use ḳhamīda kiyā

jhukā kuchh aisā ki sīdhā phir āsmāñ na huā

baġhal meñ yār-e-parī-vash ho daur-e-sāġhar ho

hameñ nasīb kisī roz ye samāñ na huā

bahār meñ na chalā zo.af se junūñ kā zor

ki apnā pairahan-e-tan ye dhajjiyāñ na huā

agar kahā to kahā us ko nuqta-e-mauhūm

tire dahan pe dahan kā kisī gumāñ na huā

havas ye thī hama-tan sirf shukr-e-haq ho.e

mire badan kā har ik roñgTā zabāñ na huā

huā hai surma-e-chashm-e-butāñ pas-e-murdan

'vafā' ġhubār bhī apnā to rā.egāñ na huā

ye raaz-e-soz-e-mohabbat kabhi ayan na hua

tamam KHana-e-dil jal gaya dhuan na hua

kabhi na KHana-e-dil mein mere wo but aaya

makin haif hai zinat-dah-e-makan na hua

hua main soz-e-tap-e-gham se jal ke KHakistar

par is tarah se ki paida zara dhuan na hua

na but-kade mein nazar aaya tu na kabe mein

KHarab tere liye main kahan kahan na hua

dui ka hum ne to dil se uTha diya parda

hazar pardon mein par wo sanam nihan na hua

habab-war hai bahr-e-jahan ke nashw-o-numa

na ho bala se agar qabr ka nishan na hua

safa-e-qalb se dekha kiya main jalwa-e-husn

hijab mane-e-nazzara-e-butan na hua

milaya KHak mein jis ko farogh par dekha

sitam-shiar koi tujh sa aasman na hua

ye kis ke bar-e-alam ne use KHamida kiya

jhuka kuchh aisa ki sidha phir aasman na hua

baghal mein yar-e-pari-wash ho daur-e-saghar ho

hamein nasib kisi roz ye saman na hua

bahaar mein na chala zoaf se junun ka zor

ki apna pairahan-e-tan ye dhajjiyan na hua

agar kaha to kaha us ko nuqta-e-mauhum

tere dahan pe dahan ka kisi guman na hua

hawas ye thi hama-tan sirf shukr-e-haq hoe

mere badan ka har ek rongTa zaban na hua

hua hai surma-e-chashm-e-butan pas-e-murdan

'wafa' ghubar bhi apna to raegan na hua