ye raaz usne chhupaya hai KHush-bayani se

ye raaz us ne chhupāyā hai ḳhush-bayānī se

ki merā zikr bhī ġhā.eb hai ab kahānī se

maiñ ḳhvāhishoñ ke namak kā huuñ Dher mat pūchho

jo merā ḳhauf hai jazboñ ke bahte paanī se

ġhurūr toḌnā maiñ chāhtā huuñ dariyā kā

badal de tū mirī luknat ko ab ravānī se

suḳhan meñ kuchh nahīñ e.ajāz kī tamannā hai

so arz karne lage ham bhī be-zabānī se

maiñ hiirā to nahīñ poshīda ko.ele meñ kahīñ

kabhī kabhī to lage Dar bhī be-nishānī se

pahāḌ jaise dinoñ ko to kaaT luuñ lekin

nikal na pā.ūñ maiñ ik raat kī girānī se

jo kaam jabr kī āñdhī bhī kar nahīñ paatī

vo kaam hotā hai ḳhāmosh mehrbānī se

mazā liyā gayā āvārgī kā ḳhuub 'suhail'

malūl maiñ na huā apnī be-makānī se

ye raaz us ne chhupaya hai KHush-bayani se

ki mera zikr bhi ghaeb hai ab kahani se

main KHwahishon ke namak ka hun Dher mat puchho

jo mera KHauf hai jazbon ke bahte pani se

ghurur toDna main chahta hun dariya ka

badal de tu meri luknat ko ab rawani se

suKHan mein kuchh nahin eajaz ki tamanna hai

so arz karne lage hum bhi be-zabani se

main hira to nahin poshida koele mein kahin

kabhi kabhi to lage Dar bhi be-nishani se

pahaD jaise dinon ko to kaT lun lekin

nikal na paun main ek raat ki girani se

jo kaam jabr ki aandhi bhi kar nahin pati

wo kaam hota hai KHamosh mehrbani se

maza liya gaya aawargi ka KHub 'suhail'

malul main na hua apni be-makani se