ye roz o shab ka tasalsul rawan-dawan hi raha

ye roz o shab kā tasalsul ravāñ-davāñ hī rahā

ye ġham-rasīdoñ kī taqdīr meñ ziyāñ hī rahā

tirī zabāñ thī mire vāste pa dil kahīñ aur

tirī ravish kā ye andāz darmiyāñ hī rahā

uThā.e phirte rahe ham ye dard kī gaThrī

magar ye dard-e-mohabbat ki be-amāñ hī rahā

jab aa.ī raat umañD aa.e yaad ke jugnū

phir us ke ba.ad to ik jashn kā samāñ hī rahā

bahut dinoñ meñ ye taḳhlīq kī phuvār paḌī

maiñ ḳhauf-e-jahl-e-murakkab se be-zabāñ hī rahā

mire lahū meñ bhī utreñ kabhī na.e mausam

ye aarzū rahī merī mirā gumāñ hī rahā

kuchh aaise daur bhī tāham giraft meñ aa.e

ki ye zamīñ rahī baaqī na āsamāñ hī rahā

ye roz o shab ka tasalsul rawan-dawan hi raha

ye gham-rasidon ki taqdir mein ziyan hi raha

teri zaban thi mere waste pa dil kahin aur

teri rawish ka ye andaz darmiyan hi raha

uThae phirte rahe hum ye dard ki gaThri

magar ye dard-e-mohabbat ki be-aman hi raha

jab aai raat umanD aae yaad ke jugnu

phir us ke baad to ek jashn ka saman hi raha

bahut dinon mein ye taKHliq ki phuwar paDi

main KHauf-e-jahl-e-murakkab se be-zaban hi raha

mere lahu mein bhi utren kabhi nae mausam

ye aarzu rahi meri mera guman hi raha

kuchh aaise daur bhi taham giraft mein aae

ki ye zamin rahi baqi na aasaman hi raha