ye rut aza ki hai shahr-e-hazin se guzrega

ye rut azā kī hai shahr-e-hazīñ se guzregā

luTe huoñ kā qabīla yahīñ se guzregā

mujhe bachā le mire yaar soz-e-imshab se

ki ik sitāra-e-vahshat jabīñ se guzregā

tamām sañg-ba-dastoñ meñ merā shīsha-e-dil

ḳhabar nahīñ thī ki itne yaqīñ se guzregā

zamīn-e-tañg se haft āsmāñ kī vus'at tak

maiñ DhūñDh lā.ūñgā tujh ko kahīñ se guzregā

dayār-e-ġhair idhar aa ke is kī vus'at naap

ik āsmān mirī sarzamīñ se guzregā

jo ek baar tirī raah se guzar jaa.e

phir us kī zid hai dobāra vahīñ se guzregā

ye rut aza ki hai shahr-e-hazin se guzrega

luTe huon ka qabila yahin se guzrega

mujhe bacha le mere yar soz-e-imshab se

ki ek sitara-e-wahshat jabin se guzrega

tamam sang-ba-daston mein mera shisha-e-dil

KHabar nahin thi ki itne yaqin se guzrega

zamin-e-tang se haft aasman ki wus'at tak

main DhunDh launga tujh ko kahin se guzrega

dayar-e-ghair idhar aa ke is ki wus'at nap

ek aasman meri sarzamin se guzrega

jo ek bar teri rah se guzar jae

phir us ki zid hai dobara wahin se guzrega