ye sahra-e-mohabbat hai yahan saya nahin koi

ye sahrā-e-mohabbat hai yahāñ saaya nahīñ koī

guzarte jā rahe haiñ sab magar ruktā nahīñ koī

tumhīñ se merī vābasta bahār-e-zindagānī thī

tumhāre baad in āñkhoñ meñ ab jachtā nahīñ koī

chalo chal kar na.ī duniyā koī ābād karte haiñ

ki mazlūmoñ kī fariyādeñ yahāñ suntā nahīñ koī

mohabbat kab kisī ko is jahāñ meñ raas aa.ī hai

tumhārī bevafā.ī kā mujhe shikva nahīñ koī

bayābāñ kī tarah lagtī haiñ jab ḳhāmosh rahtī haiñ

chhalak jaa.e to in āñkhoñ sā phir dariyā nahīñ koī

vatan pe jāñ-nisārī kā to da.avā log karte haiñ

kisī meñ jaañ luTāne kā magar jazba nahīñ koī

sabhī āsūda rahte haiñ sukūñ kī niiñd sote haiñ

hamāre shahr meñ 'jāzil' abhī bhūkā nahīñ koī

ye sahra-e-mohabbat hai yahan saya nahin koi

guzarte ja rahe hain sab magar rukta nahin koi

tumhin se meri wabasta bahaar-e-zindagani thi

tumhaare baad in aankhon mein ab jachta nahin koi

chalo chal kar nai duniya koi aabaad karte hain

ki mazlumon ki fariyaaden yahan sunta nahin koi

mohabbat kab kisi ko is jahan mein ras aai hai

tumhaari bewafai ka mujhe shikwa nahin koi

bayaban ki tarah lagti hain jab KHamosh rahti hain

chhalak jae to in aankhon sa phir dariya nahin koi

watan pe jaan-nisari ka to dawa log karte hain

kisi mein jaan luTane ka magar jazba nahin koi

sabhi aasuda rahte hain sukun ki nind sote hain

hamare shahr mein 'jazil' abhi bhuka nahin koi