ye sahra mera hai jhelam chanab uski taraf

ye sahrā merā hai jhelam chanāb us kī taraf

turāb merī taraf aur aab us kī taraf

na jaane kis ne banā.ī hai doġhlī tasvīr

haiñ ḳhaar merī taraf aur gulāb us kī taraf

zabān merī hai alfāz haiñ mire lekin

hai bāt-chīt kā lab-o-labāb us kī taraf

mirī ġhazal ke muqaddar meñ pyaas aa.ī hai

kashīd kī huī umda sharāb us kī taraf

koī muamma kabhī is tarah bhī ho maulā

savāl merī taraf huuñ javāb us kī taraf

yuuñ apnā nāma-e-a.amāl kar liyā taqsīm

gunāh merī taraf haiñ savāb us kī taraf

zarūr puchhuñgā taqsīm karne vaale se

rakhā hai kis liye saarā shabāb us kī taraf

kisī ne naam se mere uchhālā jab patthar

ubharne lag gayā ik inqalāb us kī taraf

jo ḳhud se pūchhā ki 'fānī' maiñ jā.ūñ kis raste

ishārā karne lagī hai rikāb us kī taraf

ye sahra mera hai jhelam chanab us ki taraf

turab meri taraf aur aab us ki taraf

na jaane kis ne banai hai doghli taswir

hain KHar meri taraf aur gulab us ki taraf

zaban meri hai alfaz hain mere lekin

hai baat-chit ka lab-o-labab us ki taraf

meri ghazal ke muqaddar mein pyas aai hai

kashid ki hui umda sharab us ki taraf

koi muamma kabhi is tarah bhi ho maula

sawal meri taraf hun jawab us ki taraf

yun apna nama-e-amal kar liya taqsim

gunah meri taraf hain sawab us ki taraf

zarur puchhunga taqsim karne wale se

rakha hai kis liye sara shabab us ki taraf

kisi ne nam se mere uchhaala jab patthar

ubharne lag gaya ek inqalab us ki taraf

jo KHud se puchha ki 'fani' main jaun kis raste

ishaara karne lagi hai rikab us ki taraf