ye shahr hai wo shahr ki jis mein hain be-wajh kaamyab chehre

ye shahr hai vo shahr ki jis meñ haiñ be-vaj.h kāmyāb chehre

yahāñ siyāsat kī āñdhiyoñ ne miTā diye māhtāb chehre

fareb khānā na ġham uThānā na un ke saa.e meñ muñh chhupānā

hazār kāñTe chhupā.e baiThe haiñ shoḳh rañgīñ gulāb chehre

koī bhī hamdam nahīñ hai sachchā koī bhī sāthī nahīñ hai muḳhlis

jinheñ tum apnā samajh rahe ho vahī haiñ ḳhāna-ḳharāb chehre

koī bhī ā.īna-rū nahīñ jo sadāqatoñ kī shabīh dikhā.e

ḳhushāmadoñ kī naqāb ne sab chhupā diye be-naqāb chehre

koī nayā dard sauñp deñge koī nayā zaḳhm Daal deñge

kiran kiran haiñ zahr meñ Duube haiñ zāhiran āftāb chehre

jo paḌh sako to ḳhulūs paḌh lo mirī nigāhoñ kī sādgī meñ

jahāñ meñ 'afshāñ' se log kam haiñ hoñ jin ke sachchī kitāb chehre

ye shahr hai wo shahr ki jis mein hain be-wajh kaamyab chehre

yahan siyasat ki aandhiyon ne miTa diye mahtab chehre

fareb khana na gham uThana na un ke sae mein munh chhupana

hazar kanTe chhupae baiThe hain shoKH rangin gulab chehre

koi bhi hamdam nahin hai sachcha koi bhi sathi nahin hai muKHlis

jinhen tum apna samajh rahe ho wahi hain KHana-KHarab chehre

koi bhi aaina-ru nahin jo sadaqaton ki shabih dikhae

KHushamadon ki naqab ne sab chhupa diye be-naqab chehre

koi naya dard saunp denge koi naya zaKHm Dal denge

kiran kiran hain zahr mein Dube hain zahiran aaftab chehre

jo paDh sako to KHulus paDh lo meri nigahon ki sadgi mein

jahan mein 'afshan' se log kam hain hon jin ke sachchi kitab chehre