ye shahr shahr sar-e-am ab munadi hai

ye shahr shahr sar-e-ām ab munādī hai

na vo rahegā mulāqāt kā jo aadī hai

zamīn dī hai khulī dhuup dī havā dī hai

ba-nām-e-zindagi kaisī kaḌī sazā dī hai

maiñ apne aap se kyā pūchhtā huuñ rah rah kar

ye kyuuñ lage ki kisī ne mujhe sadā dī hai

tirā hī ruup koī thā yahāñ jab aayā thā

ye dekh vaqt ne ab shakl kyā banā dī hai

duā salām to thī rasm-e-rab se thī murād

so mere shahr ne ye rasm hī uThā dī hai

faqat sadā hī suno kyuuñ nazar na aa.egī

ki ab to biich kī dīvār bhī girā dī hai

tamām umr na us ko kisī ne pahchānā

jo us ke muñh pe thī chādar vo kyuuñ haTā dī hai

ye ab gharoñ meñ na paanī na dhuup hai na jagah

zamīñ ne 'talḳh' ye shahroñ ko bad-duā dī hai

ye shahr shahr sar-e-am ab munadi hai

na wo rahega mulaqat ka jo aadi hai

zamin di hai khuli dhup di hawa di hai

ba-nam-e-zindagi kaisi kaDi saza di hai

main apne aap se kya puchhta hun rah rah kar

ye kyun lage ki kisi ne mujhe sada di hai

tera hi rup koi tha yahan jab aaya tha

ye dekh waqt ne ab shakl kya bana di hai

dua salam to thi rasm-e-rab se thi murad

so mere shahr ne ye rasm hi uTha di hai

faqat sada hi suno kyun nazar na aaegi

ki ab to bich ki diwar bhi gira di hai

tamam umr na us ko kisi ne pahchana

jo us ke munh pe thi chadar wo kyun haTa di hai

ye ab gharon mein na pani na dhup hai na jagah

zamin ne 'talKH' ye shahron ko bad-dua di hai