ye shauq sare yaqin-o-guman se pahle tha

ye shauq saare yaqīn-o-gumāñ se pahle thā

maiñ sajda-rez navā-e-azāñ se pahle thā

haiñ kā.enāt kī sab vus.ateñ usī kī gavāh

jo har zamīn se har āsmāñ se pahle thā

sitam hai us se kahūñ jism-o-jāñ pe kyā guzrī

ki jis ko ilm mire jism-o-jāñ se pahle thā

usī ne dī hai vahī ek din bujhā.egā pyaas

jo soz-e-sīna-o-ashk-e-ravāñ se pahle thā

usī se thī aur usī se rahegī apnī talab

jo aarzū kī har ik īn-o-āñ se pahle thā

vo sun rahā hai mirī be-zabāniyoñ kī zabāñ

jo harf-o-saut-o-sadā-o-zabāñ se pahle thā

ye hamd husn-e-bayāñ hai mirā ki ijz-e-suḳhan

har ek vasf jab us kā bayāñ se pahle thā

ye shauq sare yaqin-o-guman se pahle tha

main sajda-rez nawa-e-azan se pahle tha

hain kaenat ki sab wusaten usi ki gawah

jo har zamin se har aasman se pahle tha

sitam hai us se kahun jism-o-jaan pe kya guzri

ki jis ko ilm mere jism-o-jaan se pahle tha

usi ne di hai wahi ek din bujhaega pyas

jo soz-e-sina-o-ashk-e-rawan se pahle tha

usi se thi aur usi se rahegi apni talab

jo aarzu ki har ek in-o-an se pahle tha

wo sun raha hai meri be-zabaniyon ki zaban

jo harf-o-saut-o-sada-o-zaban se pahle tha

ye hamd husn-e-bayan hai mera ki ijz-e-suKHan

har ek wasf jab us ka bayan se pahle tha