ye shikasta sa jo kuchh haal mere andar hai

ye shikasta sā jo kuchh haal mire andar hai

koī to hai ki jo pāmāl mire andar hai

mere andar thā tire saath guzārā lamha

aur ab tanhā mah-o-sāl mire andar hai

roz martā hai koī bhuuk se mere andar

aisā lagtā hai ki bangāl mire andar hai

mere chehre pe koī aur nahīñ hai chehra

mere zāhir kā ḳhad-o-ḳhāl mire andar hai

fikr-dar-fikr jo rah-rah ke ulajh paḌtā huuñ

shiddat-e-ġham kā koī jaal mire andar hai

kyā kahā jaan mirī jā.egī furqat ke ta.iiñ

yā'nī vo jo hai mirā kaal mire andar hai

sab luTā kar bhī bharā rahtā hai dāman 'sādiq'

kyā ġhanī hai ye jo kangāl mire andar hai

ye shikasta sa jo kuchh haal mere andar hai

koi to hai ki jo pamal mere andar hai

mere andar tha tere sath guzara lamha

aur ab tanha mah-o-sal mere andar hai

roz marta hai koi bhuk se mere andar

aisa lagta hai ki bangal mere andar hai

mere chehre pe koi aur nahin hai chehra

mere zahir ka KHad-o-KHal mere andar hai

fikr-dar-fikr jo rah-rah ke ulajh paDta hun

shiddat-e-gham ka koi jal mere andar hai

kya kaha jaan meri jaegi furqat ke tain

ya'ni wo jo hai mera kal mere andar hai

sab luTa kar bhi bhara rahta hai daman 'sadiq'

kya ghani hai ye jo kangal mere andar hai