ye sidhe jo ab zulfon wale hue hain

ye sīdhe jo ab zulfoñ vaale hue haiñ

hamāre hī sab bal nikāle hue haiñ

tabassum-fazā mere naale hue haiñ

zarā shoḳh ab sharm vaale hue haiñ

mire haath par khele haiñ af.ī-e-zulf

ye saañp āstīnoñ ke paale hue haiñ

nahīñ ham ko laġhzish kā Dar mai-kade meñ

ki do do farishte sambhāle hue haiñ

ulajhte haiñ sote meñ zulfoñ se kyā kyā

vabāl un ko kānoñ ke baale hue haiñ

chhupā kar bahut pī hai masjid meñ vaa.iz

ye zarf-e-vuzū sab khañgāle hue haiñ

shab-e-vasl bole na ab dil meñ aa.eñ

jo armān mere nikāle hue haiñ

alag hai ḳhudā.ī se kuchh sāḳht un kī

ye but aur sāñche meñ Dhāle hue haiñ

jo yaad ab tak aate haiñ ahl-e-chaman ko

qafas meñ vahī naġhme naale hue haiñ

kisī par dam-e-hashr kyā aañkh Dālūñ

hasīñ sab mire dekhe-bhāle hue haiñ

junūñ rañg laayā hai phir fasl-e-gul meñ

nahīñ laala sab zaḳhm aale hue haiñ

charāġh ab shab-e-vasl jalne na deñge

vo gesū jo bal khā ke kaale hue haiñ

nazākat ne terī girāyā nazar se

sab kitne bhārī doshāle hue haiñ

ye ai shaiḳh gumbad nahīñ masjidoñ meñ

ḳhum-e-mai hamāre uchhāle hue haiñ

bharī bazm meñ lutf-e-ḳhalvat nahīñ hai

vo nashshe meñ haiñ ham sambhāle hue haiñ

ye kahtī hai mast aañkh un kī shab-e-vasl

ka.ī aaj ḳhālī pyāle hue haiñ

bahe haiñ jo furqat meñ āñkhoñ se merī

vo dariyā to āñkheñ nikāle hue haiñ

are kāñTo jo ashk mizhgāñ se Tapke

vahī paañv paḌ paḌ ke chhāle hue haiñ

subū āb-e-zamzam se dho kar bharī mai

achhūte haiñ jitne khañgāle hue haiñ

javānī meñ kyuuñ sar uThā.eñ na gesū

ki ab Dasne vaale ye kaale hue haiñ

vo mahshar meñ kyā aib kholeñge mere

jo rahmat se ab parda Daale hue haiñ

sunā hai 'riyāz' apnī dāḌhī baḌhā kar

buḌhāpe meñ allāh vaale hue haiñ

ye sidhe jo ab zulfon wale hue hain

hamare hi sab bal nikale hue hain

tabassum-faza mere nale hue hain

zara shoKH ab sharm wale hue hain

mere hath par khele hain afi-e-zulf

ye sanp aastinon ke pale hue hain

nahin hum ko laghzish ka Dar mai-kade mein

ki do do farishte sambhaale hue hain

ulajhte hain sote mein zulfon se kya kya

wabaal un ko kanon ke baale hue hain

chhupa kar bahut pi hai masjid mein waiz

ye zarf-e-wuzu sab khangale hue hain

shab-e-wasl bole na ab dil mein aaen

jo arman mere nikale hue hain

alag hai KHudai se kuchh saKHt un ki

ye but aur sanche mein Dhaale hue hain

jo yaad ab tak aate hain ahl-e-chaman ko

qafas mein wahi naghme nale hue hain

kisi par dam-e-hashr kya aankh Dalun

hasin sab mere dekhe-bhaale hue hain

junun rang laya hai phir fasl-e-gul mein

nahin lala sab zaKHm aale hue hain

charagh ab shab-e-wasl jalne na denge

wo gesu jo bal kha ke kale hue hain

nazakat ne teri giraya nazar se

sab kitne bhaari doshaale hue hain

ye ai shaiKH gumbad nahin masjidon mein

KHum-e-mai hamare uchhaale hue hain

bhari bazm mein lutf-e-KHalwat nahin hai

wo nashshe mein hain hum sambhaale hue hain

ye kahti hai mast aankh un ki shab-e-wasl

kai aaj KHali pyale hue hain

bahe hain jo furqat mein aankhon se meri

wo dariya to aankhen nikale hue hain

are kanTo jo ashk mizhgan se Tapke

wahi panw paD paD ke chhaale hue hain

subu aab-e-zamzam se dho kar bhari mai

achhute hain jitne khangale hue hain

jawani mein kyun sar uThaen na gesu

ki ab Dasne wale ye kale hue hain

wo mahshar mein kya aib kholenge mere

jo rahmat se ab parda Dale hue hain

suna hai 'riyaz' apni daDhi baDha kar

buDhape mein allah wale hue hain