ye soch ke rakh ho gaya hun

ye soch ke raakh ho gayā huuñ

maiñ shaam se sub.h tak jalā huuñ

jis dil meñ panāh DhūñDhtā thā

ab us se panāh māñgtā huuñ

pahle bhī ḳhudā ko māntā thā

aur ab bhī ḳhudā ko māntā huuñ

vo jaag rahā ho shāyad ab tak

ye soch ke maiñ bhī jāgtā huuñ

ai merā ḳhayāl rakhne vaale

kyā maiñ tire zehn meñ basā huuñ

martā huuñ ki mar-miTūñgā āḳhir

jiine ko to umr-bhar jiyā huuñ

har shaḳhs bichhaḌ chukā hai mujh se

kyā jāniye kis ko DhūñDhtā huuñ

hai mujh se hī zindagī ibārat

maiñ ziist kā talḳh tajraba huuñ

kyā samjhegā koī mujh ko 'sābir'

maiñ zaat se apnī māvarā huuñ

ye soch ke rakh ho gaya hun

main sham se subh tak jala hun

jis dil mein panah DhunDhta tha

ab us se panah mangta hun

pahle bhi KHuda ko manta tha

aur ab bhi KHuda ko manta hun

wo jag raha ho shayad ab tak

ye soch ke main bhi jagta hun

ai mera KHayal rakhne wale

kya main tere zehn mein basa hun

marta hun ki mar-miTunga aaKHir

jine ko to umr-bhar jiya hun

har shaKHs bichhaD chuka hai mujh se

kya jaaniye kis ko DhunDhta hun

hai mujh se hi zindagi ibarat

main zist ka talKH tajraba hun

kya samjhega koi mujh ko 'sabir'

main zat se apni mawara hun