ye talluq ke taqazon ko bhi kha jata hai

ye ta.alluq ke taqāzoñ ko bhī khā jaatā hai

shak mohabbat kī kitāboñ ko bhī khā jaatā hai

maiñ to ik maañs kā TukḌā huuñ mirī kyā auqāt

ġham kā kiiḌā to pahāḌoñ ko bhī khā jaatā hai

raat kartī hai ḳhamoshī se hifāzat din kī

din magar chāñd sitāroñ ko bhī khā jaatā hai

ye to dariyā pe hai paanī se banā kar rakkhe

varna sailāb kināroñ ko bhī khā jaatā hai

mere kamre meñ bharā rahtā hai dastak kā ġhubār

ye vo ghun hai jo kivāḌoñ ko bhī khā jaatā hai

tujh meñ parvāz kī quvvat hai magar dhyān rahe

ik ahañkār uḌānoñ ko bhī khā jaatā hai

do ghaḌī ruknā zarūrī hai 'musavvir' varna

rāsta paañv ke chhāloñ ko bhī khā jaatā hai

ye talluq ke taqazon ko bhi kha jata hai

shak mohabbat ki kitabon ko bhi kha jata hai

main to ek mans ka TukDa hun meri kya auqat

gham ka kiDa to pahaDon ko bhi kha jata hai

raat karti hai KHamoshi se hifazat din ki

din magar chand sitaron ko bhi kha jata hai

ye to dariya pe hai pani se bana kar rakkhe

warna sailab kinaron ko bhi kha jata hai

mere kamre mein bhara rahta hai dastak ka ghubar

ye wo ghun hai jo kiwaDon ko bhi kha jata hai

tujh mein parwaz ki quwwat hai magar dhyan rahe

ek ahankar uDanon ko bhi kha jata hai

do ghaDi rukna zaruri hai 'musawwir' warna

rasta panw ke chhaalon ko bhi kha jata hai