ye teri sard-mehri ye teri kaj-adai

ye terī sard-mehrī ye terī kaj-adā.ī

ik husn-e-dil-farebī ik shān-e-dilrubā.ī

aalam se terā chhupnā hai ālam-āshnā.ī

pinhāñ hijāb meñ hai andāz-e-ḳhud-numā.ī

ai ishq-e-fitna-sāmāñ terī samajh kahāñ hai

ma.asūm husn ke sar ilzām-e-bevafā.ī

us dar kā koī sajda maqbūl ho ajab kyā

kuchh ham bhī aaj kar leñ taqdīr-āzmā.ī

dhāre pe bahr-e-ġham ke be-ḳhauf jā rahe haiñ

kashtī nahīñ hamārī muhtāj-e-nā-ḳhudā.ī

ai ḳhāk-e-rāh-e-manzil ab tujh pe baar haiñ ham

ham ko biThā chukā hai ranj-e-shikasta-pā.ī

uThvā rahā hai mujh ko 'nudrat' kisī ke dar se

ye zauq-e-sajda-rezī ye shauq-e-jib.ha-sā.ī

ye teri sard-mehri ye teri kaj-adai

ek husn-e-dil-farebi ek shan-e-dilrubai

aalam se tera chhupna hai aalam-ashnai

pinhan hijab mein hai andaz-e-KHud-numai

ai ishq-e-fitna-saman teri samajh kahan hai

masum husn ke sar ilzam-e-bewafai

us dar ka koi sajda maqbul ho ajab kya

kuchh hum bhi aaj kar len taqdir-azmai

dhaare pe bahr-e-gham ke be-KHauf ja rahe hain

kashti nahin hamari muhtaj-e-na-KHudai

ai KHak-e-rah-e-manzil ab tujh pe bar hain hum

hum ko biTha chuka hai ranj-e-shikasta-pai

uThwa raha hai mujh ko 'nudrat' kisi ke dar se

ye zauq-e-sajda-rezi ye shauq-e-jibha-sai