ye to achchha hai ki dukh-dard sunane lag jao

ye to achchhā hai ki dukh-dard sunāne lag jaao

har kisī ko na magar zaḳhm dikhāne lag jaao

niil ke pāniyo raste meñ na haa.il honā

kyā pata zarb-e-kalīmī se Thikāne lag jaao

kitnī mushkil se to aa.e ho zarā Thahro bhī

sahl andāz meñ is tarah na jaane lag jaao

sāmne aao to jaise ki gul-e-tar koī

aur tanhā.ī meñ phir ashk bahāne lag jaao

mausam-e-dil jo kabhī zard sā hone lag jaa.e

apnā dil ḳhuun karo phuul ugāne lag jaao

aql samjhā.e to kuchh laaj rakho us kī bhī

jab junūñ tez ho to ḳhaak uḌāne lag jaao

kabhī tanhā.ī meñ baiTho to faqat rote raho

phir achānak hī kabhī hañsne-hañsāne lag jaao

bojh dil par hai nadāmat kā to aisā kar lo

mere siine se kisī aur bahāne lag jaao

ye to achchha hai ki dukh-dard sunane lag jao

har kisi ko na magar zaKHm dikhane lag jao

nil ke paniyo raste mein na hail hona

kya pata zarb-e-kalimi se Thikane lag jao

kitni mushkil se to aae ho zara Thahro bhi

sahl andaz mein is tarah na jaane lag jao

samne aao to jaise ki gul-e-tar koi

aur tanhai mein phir ashk bahane lag jao

mausam-e-dil jo kabhi zard sa hone lag jae

apna dil KHun karo phul ugane lag jao

aql samjhae to kuchh laj rakho us ki bhi

jab junun tez ho to KHak uDane lag jao

kabhi tanhai mein baiTho to faqat rote raho

phir achanak hi kabhi hansne-hansane lag jao

bojh dil par hai nadamat ka to aisa kar lo

mere sine se kisi aur bahane lag jao