ye to nahin ki tum se mohabbat nahin mujhe

ye to nahīñ ki tum se mohabbat nahīñ mujhe

itnā zarūr hai ki shikāyat nahīñ mujhe

maiñ huuñ ki ishtiyāq meñ sar-tā-qadam nazar

vo haiñ ki ik nazar kī ijāzat nahīñ mujhe

āzādī-e-gunāh kī hasrat ke saath saath

āzādī-e-ḳhayāl kī jur.at nahīñ mujhe

dūbhar hai garche jaur-e-azīzāñ se zindagī

lekin ḳhudā-gavāh shikāyat nahīñ mujhe

jis kā gurez shart ho taqrīb-e-dīd meñ

is hosh is nazar kī zarūrat nahīñ mujhe

jo kuchh guzar rahī hai ġhanīmat hai ham-nashīñ

ab zindagī pe ġhaur kī fursat nahīñ mujhe

maiñ kyuuñ kisī ke ahd-e-vafā kā yaqīñ karūñ

itnī shadīd ġham kī zarūrat nahīñ mujhe

sajde mire ḳhayāl-e-jazā se haiñ māvarā

maqsūd bandagī se tijārat nahīñ mujhe

maiñ aur de sakūñ na tire ġham ko zindagī

aisī to zindagī se mohabbat nahīñ mujhe

'ehsān' kaun mujh se sivā hai mirā adū

apne sivā kisī se shikāyat nahīñ mujhe

ye to nahin ki tum se mohabbat nahin mujhe

itna zarur hai ki shikayat nahin mujhe

main hun ki ishtiyaq mein sar-ta-qadam nazar

wo hain ki ek nazar ki ijazat nahin mujhe

aazadi-e-gunah ki hasrat ke sath sath

aazadi-e-KHayal ki jurat nahin mujhe

dubhar hai garche jaur-e-azizan se zindagi

lekin KHuda-gawah shikayat nahin mujhe

jis ka gurez shart ho taqrib-e-did mein

is hosh is nazar ki zarurat nahin mujhe

jo kuchh guzar rahi hai ghanimat hai ham-nashin

ab zindagi pe ghaur ki fursat nahin mujhe

main kyun kisi ke ahd-e-wafa ka yaqin karun

itni shadid gham ki zarurat nahin mujhe

sajde mere KHayal-e-jaza se hain mawara

maqsud bandagi se tijarat nahin mujhe

main aur de sakun na tere gham ko zindagi

aisi to zindagi se mohabbat nahin mujhe

'ehsan' kaun mujh se siwa hai mera adu

apne siwa kisi se shikayat nahin mujhe