ye tujhse aashna duniya se begane kahan jate

ye tujh se āshnā duniyā se begāne kahāñ jaate

tire kūche se uThte bhī to dīvāne kahāñ jaate

qafas meñ bhī mujhe sayyād ke hāthoñ se milte haiñ

mirī taqdīr ke likkhe hue daane kahāñ jaate

na chhoḌā zabt ne dāman nahīñ to tere saudā.ī

hujūm-e-ġham se ghabrā kar ḳhudā jaane kahāñ jaate

maiñ apne āñsuoñ ko kaise dāman meñ chhupā letā

jo palkoñ tak chale aa.e vo afsāne kahāñ jaate

tumhāre naam se mansūb ho jaate haiñ dīvāne

ye apne hosh meñ hote to pahchāne kahāñ jaate

agar koī harīm-e-nāz ke parde uThā detā

to phir ka.aba kahāñ rahtā sanam-ḳhāne kahāñ jaate

nahīñ thā mustahiq 'maḳhmūr' rindoñ ke sivā koī

na hote ham to phir labrez paimāne kahāñ jaate

ye tujh se aashna duniya se begane kahan jate

tere kuche se uThte bhi to diwane kahan jate

qafas mein bhi mujhe sayyaad ke hathon se milte hain

meri taqdir ke likkhe hue dane kahan jate

na chhoDa zabt ne daman nahin to tere saudai

hujum-e-gham se ghabra kar KHuda jaane kahan jate

main apne aansuon ko kaise daman mein chhupa leta

jo palkon tak chale aae wo afsane kahan jate

tumhaare nam se mansub ho jate hain diwane

ye apne hosh mein hote to pahchane kahan jate

agar koi harim-e-naz ke parde uTha deta

to phir kaba kahan rahta sanam-KHane kahan jate

nahin tha mustahiq 'maKHmur' rindon ke siwa koi

na hote hum to phir labrez paimane kahan jate