ye umar-e-hijr agar sarf-e-intizar na ho

ye umar-e-hijr agar sarf-e-intizār na ho

to vāqa.ī mujhe hastī pe e'tibār na ho

mujhe nahīñ hai agar in pe iḳhtiyār na ho

unheñ bhī ye dil-e-betāb sāzgār na ho

vahāñ vo ḳhush ki mujhe un se kuchh gila hī nahīñ

yahāñ ye paas kahīñ raaz āshkār na ho

rahā-sahā bhī dil-e-zār kā qarār gayā

vo bār-bār ye kahte haiñ be-qarār na ho

har ek dāman-e-gul par falak ke aañsū haiñ

ḳhizāñ kī maut se yuuñ zīnat-e-bahār na ho

jafā huī na vafā ab vo sīkhte haiñ hayā

ḳhudā kare ye irāda bhī ustuvār na ho

na gaa.eñ ishq ke naġhme jo bulbuleñ 'tālib'

chaman meñ gul na khileñ mausam-e-bahār na ho

ye umar-e-hijr agar sarf-e-intizar na ho

to waqai mujhe hasti pe e'tibar na ho

mujhe nahin hai agar in pe iKHtiyar na ho

unhen bhi ye dil-e-betab sazgar na ho

wahan wo KHush ki mujhe un se kuchh gila hi nahin

yahan ye pas kahin raaz aashkar na ho

raha-saha bhi dil-e-zar ka qarar gaya

wo bar-bar ye kahte hain be-qarar na ho

har ek daman-e-gul par falak ke aansu hain

KHizan ki maut se yun zinat-e-bahaar na ho

jafa hui na wafa ab wo sikhte hain haya

KHuda kare ye irada bhi ustuwar na ho

na gaen ishq ke naghme jo bulbulen 'talib'

chaman mein gul na khilen mausam-e-bahaar na ho