ye umr guzri hai itne sitam uThane mein

ye umr guzrī hai itne sitam uThāne meñ

ki ḳhauf aatā hai aglā qadam uThāne meñ

zamīñ kā mujh se havāla bhī TuuT paayā nahīñ

maiñ sarfarāz rahā terā ġham uThāne meñ

har ek shai pe hai yaksāniyat kā ġhalba kyuuñ

ye imtiyāz-e-vajūd-o-adam uThāne meñ

chamak ke kūcha-e-qātil meñ neze kyā karte

ki josh-e-ḳhūñ thā hamāre qalam uThāne meñ

tumhārī yaad bhī aa.ī to kis tarah aa.ī

hayāt ruk sī ga.ī chashm-e-nam uThāne meñ

shikast khā na sakā merā lafz-e-haq 'rāshid'

maiñ be-ḳhatar rahā us kā alam uThāne meñ

ye umr guzri hai itne sitam uThane mein

ki KHauf aata hai agla qadam uThane mein

zamin ka mujh se hawala bhi TuT paya nahin

main sarfaraaz raha tera gham uThane mein

har ek shai pe hai yaksaniyat ka ghalba kyun

ye imtiyaz-e-wajud-o-adam uThane mein

chamak ke kucha-e-qatil mein neze kya karte

ki josh-e-KHun tha hamare qalam uThane mein

tumhaari yaad bhi aai to kis tarah aai

hayat ruk si gai chashm-e-nam uThane mein

shikast kha na saka mera lafz-e-haq 'rashid'

main be-KHatar raha us ka alam uThane mein