ye uzr-e-imtihan-e-jazb-e-dil kaisa nikal aaya

ye uzr-e-imtihān-e-jazb-e-dil kaisā nikal aayā

maiñ ilzām us ko detā thā qusūr apnā nikal aayā

na shādī-marg huuñ kyūñkar hai muzhda qatl-e-dushman kā

ki ghar meñ se liye shamshīr vo rotā nikal aayā

sitam ai garmi-e-zabt-e-fuġhān-o-āh chhātī par

kabhū bas paḌ gayā chhālā kabhū phoḌā nikal aayā

kiyā zanjīr mujh ko chāra-gar ne kin dinoñ meñ jab

adū kī qaid se vo shoḳh-e-be-parvā nikal aayā

nikal aayā agar aañsū to zālim mat nikāl āñkheñ

sunā ma.azūr hai muztar nikal aayā nikal aayā

hamāre ḳhūñ-bahā kā ġhair se da.avā hai qātil ko

ye bād-e-infisāl ab aur hī jhagḌā nikal aayā

huī bulbul sanā-ḳhvān-e-dahān-e-tañg kis gul kī

ki farvardī meñ ġhunche kā muñh itnā sā nikal aayā

koī tiir us kā dil meñ rah gayā thā kyā ki āñkhoñ se

abhī rone meñ ik paikān kā TukḌā nikal aayā

dam-e-bismil ye kis ke ḳhauf se ham pī ga.e aañsū

ki har zaḳhm-e-badan se ḳhuun kā dariyā nikal aayā

ḳhadañg-e-yār ke hamrāh niklī jaan siine se

yahī armān ik muddat se jī meñ thā nikal aayā

bahut nāzāñ hai tū ai qais par vahshat dikhā.ūñgā

kitāboñ meñ kabhū qissa jo 'momin' kā nikal aayā

ye uzr-e-imtihan-e-jazb-e-dil kaisa nikal aaya

main ilzam us ko deta tha qusur apna nikal aaya

na shadi-marg hun kyunkar hai muzhda qatl-e-dushman ka

ki ghar mein se liye shamshir wo rota nikal aaya

sitam ai garmi-e-zabt-e-fughan-o-ah chhati par

kabhu bas paD gaya chhaala kabhu phoDa nikal aaya

kiya zanjir mujh ko chaara-gar ne kin dinon mein jab

adu ki qaid se wo shoKH-e-be-parwa nikal aaya

nikal aaya agar aansu to zalim mat nikal aankhen

suna mazur hai muztar nikal aaya nikal aaya

hamare KHun-baha ka ghair se dawa hai qatil ko

ye baad-e-infisal ab aur hi jhagDa nikal aaya

hui bulbul sana-KHwan-e-dahan-e-tang kis gul ki

ki farwardi mein ghunche ka munh itna sa nikal aaya

koi tir us ka dil mein rah gaya tha kya ki aankhon se

abhi rone mein ek paikan ka TukDa nikal aaya

dam-e-bismil ye kis ke KHauf se hum pi gae aansu

ki har zaKHm-e-badan se KHun ka dariya nikal aaya

KHadang-e-yar ke hamrah nikli jaan sine se

yahi arman ek muddat se ji mein tha nikal aaya

bahut nazan hai tu ai qais par wahshat dikhaunga

kitabon mein kabhu qissa jo 'momin' ka nikal aaya