ye zamin KHwab hai aasman KHwab hai

ye zamīñ ḳhvāb hai āsmāñ ḳhvāb hai

ik makāñ hī nahīñ lā-makāñ ḳhvāb hai

jān-levā sahī justujū kī thakan

par sahārā diye ik javāñ ḳhvāb hai

us kī āñkhoñ meñ apnā.iyat kī chamak

merī āñkhoñ kā ik be-amāñ ḳhvāb hai

TuuT jaa.e to kuchh bhī nahīñ koī bhī

jis ke dam se haiñ donoñ jahāñ ḳhvāb hai

chilchilātī huī vaqt kī dhuup meñ

saath ik sāya-e-mehrbāñ ḳhvāb hai

tū sarāb-e-hasīñ maiñ fareb-e-nazar

pyaar terā mirī jān-e-jāñ ḳhvāb hai

shādī-e-be-panah kā sabab hai magar

vaj.h-e-āh-o-fuġhāñ bhī miyāñ ḳhvāb hai

zindagī ke kaThin jañgaloñ meñ mirā

har qadam rāhbar pāsbāñ ḳhvāb hai

jān-e-'shahzād' tanhā.iyāñ haiñ aTal

aur baaqī kā ye kārvāñ ḳhvāb hai

ye zamin KHwab hai aasman KHwab hai

ek makan hi nahin la-makan KHwab hai

jaan-lewa sahi justuju ki thakan

par sahaara diye ek jawan KHwab hai

us ki aankhon mein apnaiyat ki chamak

meri aankhon ka ek be-aman KHwab hai

TuT jae to kuchh bhi nahin koi bhi

jis ke dam se hain donon jahan KHwab hai

chilchilati hui waqt ki dhup mein

sath ek saya-e-mehrban KHwab hai

tu sarab-e-hasin main fareb-e-nazar

pyar tera meri jaan-e-jaan KHwab hai

shadi-e-be-panah ka sabab hai magar

wajh-e-ah-o-fughan bhi miyan KHwab hai

zindagi ke kaThin jangalon mein mera

har qadam rahbar pasban KHwab hai

jaan-e-'shahzad' tanhaiyan hain aTal

aur baqi ka ye karwan KHwab hai