ye zist ranj mein guzre ki shadman guzre

ye ziist rañj meñ guzre ki shādmāñ guzre

tire baġhair jo guzre to rā.egāñ guzre

ba-qaid-e-hosh jo guzre ba-qaid-e-jāñ guzre

vo kyā maqām-e-mohabbat se kāmrāñ guzre

nazar ko apnī basārat bhī jab girāñ guzre

ḳhudā kare na phir āñkhoñ se vo samāñ guzre

dayār-e-shauq se jab bahr-e-imtihāñ guzre

ham apnī jaan se guzre to kāmrāñ guzre

qadam qadam pe ḳhirad sadd-e-rāh thī lekin

junūn-e-shauq salāmat ravāñ-davāñ guzre

ye mai-kada vo jagah hai jahāñ se ai saaqī

nazar churā.e hue gardish-e-jahāñ guzre

chaman-parast huuñ mujh ko chaman se ulfat hai

balā se us meñ bahār aa.e yā ḳhizāñ guzre

tirā karam hai jo sāya-fagan to kyā ġham hai

hazār baar mire sar se āsmāñ guzre

kisī kā faiz 'mubārak' nahīñ to phir kyā hai

ki ham jahāñ se bhī guzre haiñ kāmrāñ guzre

ye zist ranj mein guzre ki shadman guzre

tere baghair jo guzre to raegan guzre

ba-qaid-e-hosh jo guzre ba-qaid-e-jaan guzre

wo kya maqam-e-mohabbat se kaamran guzre

nazar ko apni basarat bhi jab giran guzre

KHuda kare na phir aankhon se wo saman guzre

dayar-e-shauq se jab bahr-e-imtihan guzre

hum apni jaan se guzre to kaamran guzre

qadam qadam pe KHirad sadd-e-rah thi lekin

junun-e-shauq salamat rawan-dawan guzre

ye mai-kada wo jagah hai jahan se ai saqi

nazar churae hue gardish-e-jahan guzre

chaman-parast hun mujh ko chaman se ulfat hai

bala se us mein bahaar aae ya KHizan guzre

tera karam hai jo saya-fagan to kya gham hai

hazar bar mere sar se aasman guzre

kisi ka faiz 'mubarak' nahin to phir kya hai

ki hum jahan se bhi guzre hain kaamran guzre