ye zindagi nae manzar dikha rahi hai mujhe

ye zindagī na.e manzar dikhā rahī hai mujhe

ḳhizāñ hai āḳhirī mausam batā rahī hai mujhe

hañsā rahī hai kabhī ye rulā rahī hai mujhe

ġhazal mirī hī kahānī sunā rahī hai mujhe

vo ek shai jo ki siine meñ hai kahīñ maujūd

kisī ke hukm pe pal pal chalā rahī hai mujhe

ye ittifāq nahīñ haiñ koī duā hai jo

yuuñ hādsoñ se musalsal bachā rahī hai mujhe

tū buzdilī na samajh ye hī to sharāfat hai

mire lahū kī nafāsat jhukā rahī hai mujhe

jo ek lahr bhañvar ke thī aas paas kahīñ

vo dhīre dhīre kināre lagā rahī hai mujhe

baġhair us ke thī mumkin kahāñ rihā.ī mirī

ye maut aa ke balā se chhuḌā rahī hai mujhe

na.e libās meñ lipTā huā huuñ aur ye zamīñ

mire vajūd kī qīmat batā rahī hai mujhe

ye tez dhuup ye sahrāoñ kā safar 'ruḳhsār'

yahī tapish hai jo kundan banā rahī hai mujhe

ye zindagi nae manzar dikha rahi hai mujhe

KHizan hai aaKHiri mausam bata rahi hai mujhe

hansa rahi hai kabhi ye rula rahi hai mujhe

ghazal meri hi kahani suna rahi hai mujhe

wo ek shai jo ki sine mein hai kahin maujud

kisi ke hukm pe pal pal chala rahi hai mujhe

ye ittifaq nahin hain koi dua hai jo

yun hadson se musalsal bacha rahi hai mujhe

tu buzdili na samajh ye hi to sharafat hai

mere lahu ki nafasat jhuka rahi hai mujhe

jo ek lahr bhanwar ke thi aas pas kahin

wo dhire dhire kinare laga rahi hai mujhe

baghair us ke thi mumkin kahan rihai meri

ye maut aa ke bala se chhuDa rahi hai mujhe

nae libas mein lipTa hua hun aur ye zamin

mere wajud ki qimat bata rahi hai mujhe

ye tez dhup ye sahraon ka safar 'ruKHsar'

yahi tapish hai jo kundan bana rahi hai mujhe