ye zindagi saza ke siwa aur kuchh nahin

ye zindagī sazā ke sivā aur kuchh nahīñ

har saañs bad-duā ke sivā aur kuchh nahīñ

bikhrī haiñ rāstoñ pe safar kī kahāniyāñ

duniyā nuqūsh-e-pā ke sivā aur kuchh nahīñ

bachchoñ kī laash chāk-ridā aur burīda-sar

har shahr karbalā ke sivā aur kuchh nahīñ

zambīl zindagī meñ baḌoñ kā diyā huā

kuchh sikka-e-duā ke sivā aur kuchh nahīñ

ye tajraba mirā hai ki ik lamha-e-nashāt

miTTī bharī ġhizā ke sivā aur kuchh nahīñ

aks aur ā.īna meñ agar rābta na ho

ye bhī ġhalat anā ke sivā aur kuchh nahīñ

har shai ko us ke asl kī tamsīl jāniye

kaunain meñ ḳhudā ke sivā aur kuchh nahīñ

ai 'ramz' koī de de mujhe zahr-e-be-hisī

ye āgahī sazā ke sivā aur kuchh nahīñ

ye zindagi saza ke siwa aur kuchh nahin

har sans bad-dua ke siwa aur kuchh nahin

bikhri hain raston pe safar ki kahaniyan

duniya nuqush-e-pa ke siwa aur kuchh nahin

bachchon ki lash chaak-rida aur burida-sar

har shahr karbala ke siwa aur kuchh nahin

zambil zindagi mein baDon ka diya hua

kuchh sikka-e-dua ke siwa aur kuchh nahin

ye tajraba mera hai ki ek lamha-e-nashat

miTTi bhari ghiza ke siwa aur kuchh nahin

aks aur aaina mein agar rabta na ho

ye bhi ghalat ana ke siwa aur kuchh nahin

har shai ko us ke asl ki tamsil jaaniye

kaunain mein KHuda ke siwa aur kuchh nahin

ai 'ramz' koi de de mujhe zahr-e-be-hisi

ye aagahi saza ke siwa aur kuchh nahin