yun bhi ek bazm-e-sada humne sajai pahron

yuuñ bhī ik bazm-e-sadā ham ne sajā.ī pahroñ

kaan bajte rahe āvāz na aa.ī pahroñ

ik tirā naam thā ubhrā jo fasīl-e-lab par

varna sakte meñ rahī saarī ḳhudā.ī pahroñ

lamha-bhar ke liye barsī tirī yādoñ kī ghaTā

ham ne bhīgī huī chilman na uThā.ī pahroñ

vo to phir ġhair thā ġhairoñ se shikāyat kyā ho

nabz apnī bhī mire haath na aa.ī pahroñ

aañkh jhapkī to ravāñ thī vo havā ke ruḳh par

ham ne jo ret kī dīvār banā.ī pahroñ

par sameTe hue yuuñ chupke se lamha guzrā

shab kī dahlīz pe dī ham ne duhā.ī pahroñ

lauT kar aa.e na bhaTke hue raahī dil meñ

aag is dasht meñ ham ne to jalā.ī pahroñ

phir bhī le de ke vahī rog purānā niklā

ham ne moḌī hai ḳhayāloñ kī kalā.ī pahroñ

vo hayūle the ki saa.e the sar-e-raqs 'rashīd'

jism kī ek bhī jhankār na aa.ī pahroñ

yun bhi ek bazm-e-sada hum ne sajai pahron

kan bajte rahe aawaz na aai pahron

ek tera nam tha ubhra jo fasil-e-lab par

warna sakte mein rahi sari KHudai pahron

lamha-bhar ke liye barsi teri yaadon ki ghaTa

hum ne bhigi hui chilman na uThai pahron

wo to phir ghair tha ghairon se shikayat kya ho

nabz apni bhi mere hath na aai pahron

aankh jhapki to rawan thi wo hawa ke ruKH par

hum ne jo ret ki diwar banai pahron

par sameTe hue yun chupke se lamha guzra

shab ki dahliz pe di hum ne duhai pahron

lauT kar aae na bhaTke hue rahi dil mein

aag is dasht mein hum ne to jalai pahron

phir bhi le de ke wahi rog purana nikla

hum ne moDi hai KHayalon ki kalai pahron

wo hayule the ki sae the sar-e-raqs 'rashid'

jism ki ek bhi jhankar na aai pahron