yun bulane se nind kab aai

yuuñ bulāne se niiñd kab aa.ī

jab bhī aa.ī hai be-talab aa.ī

ro paḌe dil dayār ke baasī

un ke ghar meñ bahār jab aa.ī

maiñ kisī bazm meñ agar aayā

saath mere tumhārī chhab aa.ī

dil hī dhaḌkā na aañkh hī phaḌkī

kyoñ tirī yaad be-sabab aa.ī

chashm-e-tar tū baras na soch abhī

bhaaḌ dasht-e-junūñ meñ kab aa.ī

yaad kā bhī ajiib aalam hai

jab na aanā use thā jab aa.ī

un se milne kī jab bhī baat chhiḌī

his nigāhoñ meñ jāñ-ba-lab aa.ī

hijr kī dhuup Dhalte-Dhalte Dhalī

vasl kī shub ghaḌī na shab aa.ī

ḳhush-nasībī kī rut bhī kyoñ 'īraj'

maiñ ne chāhā na thā ki tab aa.ī

yun bulane se nind kab aai

jab bhi aai hai be-talab aai

ro paDe dil dayar ke basi

un ke ghar mein bahaar jab aai

main kisi bazm mein agar aaya

sath mere tumhaari chhab aai

dil hi dhaDka na aankh hi phaDki

kyon teri yaad be-sabab aai

chashm-e-tar tu baras na soch abhi

bhaD dasht-e-junun mein kab aai

yaad ka bhi ajib aalam hai

jab na aana use tha jab aai

un se milne ki jab bhi baat chhiDi

his nigahon mein jaan-ba-lab aai

hijr ki dhup Dhalte-Dhalte Dhali

wasl ki shub ghaDi na shab aai

KHush-nasibi ki rut bhi kyon 'iraj'

main ne chaha na tha ki tab aai