yun hi galiyon mein muqaddar dar-ba-dar mera bhi hai

yuuñ hī galiyoñ meñ muqaddar dar-ba-dar merā bhī hai

kyuuñ nahīñ suntā mirī tū kuchh agar merā bhī hai

qātiloñ ko ab sazā ho yā na ho lekin kisī

hāshiye par ik bayān-e-muḳhtasar merā bhī hai

maiñ bhī jūjhā huuñ havā se us kabūtar kī tarah

dekh vo āñdhī meñ uḌtā ek par merā bhī hai

paañv tere rāste tere safar terā magar

kyuuñ pasīne meñ badan phir tar-ba-tar merā bhī hai

dard kī vaadī meñ aahoñ kā mohalla hai jahāñ

bas vahīñ pahlī saḌak par ek ghar merā bhī hai

yuuñ na ho maiñ baiTh jā.ūñ terī paichal ke baġhair

dhuup meñ sahrā kī uktāyā safar merā bhī hai

kaisā pāgal-pan ki us ke shahr meñ denī hai jaan

ab kahāñ huuñ maiñ akelā ham-safar merā bhī hai

ik uchaTtī sī nazar ḳhālī mohabbat kī nazar

āsmāñ ik chāhiye mujh ko ki sar merā bhī hai

saath hoñge ham to sach meñ phuul khilte jā.eñge

aap kā hī bas nahīñ tanhā safar merā bhī hai

ḳhud se bhī miltā nahīñ maiñ tujh gale milne ke ba.ad

saath rakhne meñ tirī ḳhushbū hunar merā bhī hai

jab bhī kuchh maiñ ne kahā kyuuñ aap tak pahuñchā nahīñ

aap kā qāsid yaqīnan nāma-bar merā bhī hai

yun hi galiyon mein muqaddar dar-ba-dar mera bhi hai

kyun nahin sunta meri tu kuchh agar mera bhi hai

qatilon ko ab saza ho ya na ho lekin kisi

hashiye par ek bayan-e-muKHtasar mera bhi hai

main bhi jujha hun hawa se us kabutar ki tarah

dekh wo aandhi mein uDta ek par mera bhi hai

panw tere raste tere safar tera magar

kyun pasine mein badan phir tar-ba-tar mera bhi hai

dard ki wadi mein aahon ka mohalla hai jahan

bas wahin pahli saDak par ek ghar mera bhi hai

yun na ho main baiTh jaun teri paichal ke baghair

dhup mein sahra ki uktaya safar mera bhi hai

kaisa pagal-pan ki us ke shahr mein deni hai jaan

ab kahan hun main akela ham-safar mera bhi hai

ek uchaTti si nazar KHali mohabbat ki nazar

aasman ek chahiye mujh ko ki sar mera bhi hai

sath honge hum to sach mein phul khilte jaenge

aap ka hi bas nahin tanha safar mera bhi hai

KHud se bhi milta nahin main tujh gale milne ke baad

sath rakhne mein teri KHushbu hunar mera bhi hai

jab bhi kuchh main ne kaha kyun aap tak pahuncha nahin

aap ka qasid yaqinan nama-bar mera bhi hai