yun kar rahe hain mohabbat mein ehtiyat ab ke

yuuñ kar rahe haiñ mohabbat meñ ehtiyāt ab ke

ki duur rah ke kiyā un se irtibāt ab ke

safar thā dil kā kisī dasht-e-be-karāñ jaisā

nazar ne dekhā hai saaya na hī rabāt ab ke

chalī hai kaisī havā jaane sehn-e-gulshan meñ

ki chhin ga.ī hai lab-e-gul se imbisāt ab ke

maiñ hārne ke liye khelūñ ziist kī baazī

bichhā ai zindagī aisī koī bisāt ab ke

bhaTak ga.e haiñ tirī chaah meñ yuuñ manzil se

ki māñgī ham ne duā ihdinassirāt ab ke

jhulas ga.e haiñ sar-e-shāḳh ḳhaar gulshan meñ

na raas aayā gulāboñ se iḳhtilāt ab ke

zabūl-e-fikr-o-nazar kā sabab hai hijr tirā

ki vasl lamhoñ se mafqūd hai nashāt ab ke

yun kar rahe hain mohabbat mein ehtiyat ab ke

ki dur rah ke kiya un se irtibaat ab ke

safar tha dil ka kisi dasht-e-be-karan jaisa

nazar ne dekha hai saya na hi rabaat ab ke

chali hai kaisi hawa jaane sehn-e-gulshan mein

ki chhin gai hai lab-e-gul se imbisat ab ke

main haarne ke liye khelun zist ki bazi

bichha ai zindagi aisi koi bisat ab ke

bhaTak gae hain teri chah mein yun manzil se

ki mangi hum ne dua ihdinassiraat ab ke

jhulas gae hain sar-e-shaKH KHar gulshan mein

na ras aaya gulabon se iKHtilat ab ke

zabul-e-fikr-o-nazar ka sabab hai hijr tera

ki wasl lamhon se mafqud hai nashat ab ke