yun KHabar kise thi meri teri muKHbiri se pahle

yuuñ ḳhabar kise thī merī tirī muḳhbirī se pahle

maiñ masarratoñ meñ gum thā tirī dostī se pahle

tire husn ne jagāyā mere ishq-e-be-bahā ko

tirī justujū kahāñ thī mujhe shā.irī se pahle

tū sharīk-e-zindagī hai maiñ huuñ ġham-gusār terā

terā ġham rahā hai shāmil merī har ḳhushī se pahle

de agar mujhe ijāzat jo mirā zamīr mujh ko

maiñ tujhe ḳhudā banā luuñ tirī bandagī se pahle

tire husn kī kahānī mire ishq kā fasāna

bahut aam ho chukā hai ġham-e-āshiqī se pahle

tujhe rahnumā banā kar mujhe mil ga.ī hai manzil

maiñ bahut bhaTak rahā thā tirī rahbarī se pahle

kaho mīr-e-kārvāñ se mujhe is tarah na dekhe

maiñ baḌā farāḳh-dil thā kabhī dil-lagī se pahle

ye matā-e-ranj-o-ġham aur shab-e-hijr kā ye 'ālam'

thā kahāñ mirā muqaddar tirī be-ruḳhī se pahle

yun KHabar kise thi meri teri muKHbiri se pahle

main masarraton mein gum tha teri dosti se pahle

tere husn ne jagaya mere ishq-e-be-baha ko

teri justuju kahan thi mujhe shairi se pahle

tu sharik-e-zindagi hai main hun gham-gusar tera

tera gham raha hai shamil meri har KHushi se pahle

de agar mujhe ijazat jo mera zamir mujh ko

main tujhe KHuda bana lun teri bandagi se pahle

tere husn ki kahani mere ishq ka fasana

bahut aam ho chuka hai gham-e-ashiqi se pahle

tujhe rahnuma bana kar mujhe mil gai hai manzil

main bahut bhaTak raha tha teri rahbari se pahle

kaho mir-e-karwan se mujhe is tarah na dekhe

main baDa faraKH-dil tha kabhi dil-lagi se pahle

ye mata-e-ranj-o-gham aur shab-e-hijr ka ye 'alam'

tha kahan mera muqaddar teri be-ruKHi se pahle