yun nibh rahi hai apni gham-e-zindagi ke sath

yuuñ nibh rahī hai apnī ġham-e-zindagī ke saath

nibhtī hai jaise ajnabī kī ajnabī ke saath

aate sabhī haiñ shor machāte jahān meñ

jaate haiñ sab jahāñ se magar ḳhāmushī ke saath

sab toḌ leñge rābta duniyā meñ aap se

milte raheñge sab se agar be-ruḳhī ke saath

rahtī haiñ un se duur jahāñ-bhar kī gardisheñ

jiite haiñ jo bhī zindagī zinda-dilī ke saath

sāthī vahī hai sachchā tumhārā jahān meñ

apnā.e tum ko jo bhī tumhārī kamī ke saath

saanī nahīñ hai us kā koī bhī jahān meñ

kartā hai aadmī jo daġhā aadmī ke saath

'hīrā' fuzūl aas hai duniyā se pālnā

kartā kahāñ vafā hai zamāna kisī ke saath

yun nibh rahi hai apni gham-e-zindagi ke sath

nibhti hai jaise ajnabi ki ajnabi ke sath

aate sabhi hain shor machate jahan mein

jate hain sab jahan se magar KHamushi ke sath

sab toD lenge rabta duniya mein aap se

milte rahenge sab se agar be-ruKHi ke sath

rahti hain un se dur jahan-bhar ki gardishen

jite hain jo bhi zindagi zinda-dili ke sath

sathi wahi hai sachcha tumhaara jahan mein

apnae tum ko jo bhi tumhaari kami ke sath

sani nahin hai us ka koi bhi jahan mein

karta hai aadmi jo dagha aadmi ke sath

'hira' fuzul aas hai duniya se palna

karta kahan wafa hai zamana kisi ke sath