yun saja chand ki jhalka tere andaz ka rang

yuuñ sajā chāñd ki jhalkā tire andāz kā rañg

yuuñ fazā mahkī ki badlā mire hamrāz kā rañg

sāya-e-chashm meñ hairāñ ruḳh-e-raushan kā jamāl

surḳhī-e-lab meñ pareshāñ tirī āvāz kā rañg

be-piye huuñ ki agar lutf karo āḳhir-e-shab

shīsha-e-mai meñ Dhale sub.h ke āġhāz kā rañg

chañg o nai rañg pe the apne lahū ke dam se

dil ne lai badlī to maddham huā har saaz kā rañg

ik suḳhan aur ki phir rañg-e-takallum terā

harf-e-sāda ko ināyat kare e.ajāz kā rañg

yun saja chand ki jhalka tere andaz ka rang

yun faza mahki ki badla mere hamraaz ka rang

saya-e-chashm mein hairan ruKH-e-raushan ka jamal

surKHi-e-lab mein pareshan teri aawaz ka rang

be-piye hun ki agar lutf karo aaKHir-e-shab

shisha-e-mai mein Dhale subh ke aaghaz ka rang

chang o nai rang pe the apne lahu ke dam se

dil ne lai badli to maddham hua har saz ka rang

ek suKHan aur ki phir rang-e-takallum tera

harf-e-sada ko inayat kare eajaz ka rang