yun shab-e-hijr bitai maine

yuuñ shab-e-hijr bitā.ī maiñ ne

niiñd tāqoñ meñ jalā.ī maiñ ne

chhoḌ jā.ūñgī qasam se tujh ko

aur qasam bhī tirī khaa.ī maiñ ne

us kī āñkhoñ se churā kar kuchh ashk

raat kī pahlī kamā.ī maiñ ne

us kā ġham sard kiyā aahoñ se

dhuup meñ chhāñv milā.ī maiñ ne

jaane kyoñ ruuh kī dīvār pe aaj

zard sī bel chaḌhā.ī maiñ ne

naam takiye pe tirā likhnā thā

is liye sīkhī kaḌhā.ī maiñ ne

bech kar 'sa.adiya' zevar maañ kā

puurī kī apnī paḌhā.ī maiñ ne

yun shab-e-hijr bitai main ne

nind taqon mein jalai main ne

chhoD jaungi qasam se tujh ko

aur qasam bhi teri khai main ne

us ki aankhon se chura kar kuchh ashk

raat ki pahli kamai main ne

us ka gham sard kiya aahon se

dhup mein chhanw milai main ne

jaane kyon ruh ki diwar pe aaj

zard si bel chaDhai main ne

nam takiye pe tera likhna tha

is liye sikhi kaDhai main ne

bech kar 'sadiya' zewar man ka

puri ki apni paDhai main ne