yun to hawas-e-baKHshish-o-inam bahut hai

yuuñ to havas-e-baḳhshish-o-in'ām bahut hai

mil jaa.e jo saaqī se vahī jaam bahut hai

kyā saaf nazar aa.eñ badalte hue chehre

dhuñdhlā abhī ā.īna-e-ayyām bahut hai

nazroñ ko to kuchh aap kī kahtā nahīñ koī

kyoñ dil pe mire yūrish-e-ilzām bahut hai

hai maslahat-e-vaqt kā shāyad ye ishāra

mujh par jo abhī bārish-e-ikrām bahut hai

dekhā hī nahīñ zarf ko apne kabhī tum ne

aur dil meñ havas bāda-e-gulfām bahut hai

aa.egī shab-e-vasl bhī ai zulmat-e-hijrāñ

maanā ki tirī zulf-e-siyah-fām bahut hai

tārājī-e-gulshan kī ḳhabar mil ga.ī shāyad

masrūf-e-fuġhāñ said-e-tah-e-dām bahut hai

mumkin hai badal jaa.eñ kabhī vaqt ke tevar

maanā ki abhī talḳhī-e-ayyām bahut hai

rahne nahīñ detā hai kahīñ chain se mujh ko

āzurda jo mujh se dil-e-nākām bahut hai

shāmil haiñ tirī bazm meñ rindān-e-balā-nosh

mere liye bas durd-e-tah-e-jām bahut hai

pahchān ga.e ham jo zamāne kī nigāheñ

terā ye karam gardish-e-ayyām bahut hai

kyoñ chheḌiye āġhāz-e-mohabbat kā fasāna

dil meñ ḳhalish-e-nashtar-e-anjām bahut hai

ham ko bhī bharosa hai bahut apnī ḳhudī par

hoñToñ se agar fāsla-e-jām bahut hai

zinda rahe 'bahzād' to pūchhā na kisī ne

sunte haiñ ki mar jaane pe kohrām bahut hai

yun to hawas-e-baKHshish-o-in'am bahut hai

mil jae jo saqi se wahi jam bahut hai

kya saf nazar aaen badalte hue chehre

dhundhla abhi aaina-e-ayyam bahut hai

nazron ko to kuchh aap ki kahta nahin koi

kyon dil pe mere yurish-e-ilzam bahut hai

hai maslahat-e-waqt ka shayad ye ishaara

mujh par jo abhi barish-e-ikram bahut hai

dekha hi nahin zarf ko apne kabhi tum ne

aur dil mein hawas baada-e-gulfam bahut hai

aaegi shab-e-wasl bhi ai zulmat-e-hijran

mana ki teri zulf-e-siyah-fam bahut hai

taraji-e-gulshan ki KHabar mil gai shayad

masruf-e-fughan said-e-tah-e-dam bahut hai

mumkin hai badal jaen kabhi waqt ke tewar

mana ki abhi talKHi-e-ayyam bahut hai

rahne nahin deta hai kahin chain se mujh ko

aazurda jo mujh se dil-e-nakaam bahut hai

shamil hain teri bazm mein rindan-e-bala-nosh

mere liye bas durd-e-tah-e-jam bahut hai

pahchan gae hum jo zamane ki nigahen

tera ye karam gardish-e-ayyam bahut hai

kyon chheDiye aaghaz-e-mohabbat ka fasana

dil mein KHalish-e-nashtar-e-anjam bahut hai

hum ko bhi bharosa hai bahut apni KHudi par

honTon se agar fasla-e-jam bahut hai

zinda rahe 'bahzad' to puchha na kisi ne

sunte hain ki mar jaane pe kohram bahut hai