yun to iKHlas mein is ke koi dhoka bhi nahin

yuuñ to iḳhlās meñ is ke koī dhokā bhī nahīñ

kab badal jaa.e magar is kā bharosā bhī nahīñ

kaaT dī vaqt ne zanjīr-e-ta.alluq kī kaḌī

ab musāfir ko koī rokne vaalā bhī nahīñ

phir na yādoñ ke kahīñ band darīche khul jaa.eñ

muddatoñ se tirī tasvīr ko dekhā bhī nahīñ

jal gayā dhuup meñ yādoñ kā ḳhunuk saaya bhī

be-navā dasht-e-balā meñ koī ham sā bhī nahīñ

thak ga.e haiñ mire nākām irādoñ ke qadam

ab nigāhoñ meñ koī shauq kā sahrā bhī nahīñ

aa.ine aks se mahrūm nigah manzar se

ab ye tanhā.ī kā aalam hai ki saayā bhī nahīñ

ai mirī umr ke ma.azūr guzarte lamho

tum ne jaate hue muḌ kar kabhī dekhā bhī nahīñ

yun to iKHlas mein is ke koi dhoka bhi nahin

kab badal jae magar is ka bharosa bhi nahin

kaT di waqt ne zanjir-e-talluq ki kaDi

ab musafir ko koi rokne wala bhi nahin

phir na yaadon ke kahin band dariche khul jaen

muddaton se teri taswir ko dekha bhi nahin

jal gaya dhup mein yaadon ka KHunuk saya bhi

be-nawa dasht-e-bala mein koi hum sa bhi nahin

thak gae hain mere nakaam iradon ke qadam

ab nigahon mein koi shauq ka sahra bhi nahin

aaine aks se mahrum nigah manzar se

ab ye tanhai ka aalam hai ki saya bhi nahin

ai meri umr ke mazur guzarte lamho

tum ne jate hue muD kar kabhi dekha bhi nahin