yun to kam kam thi mohabbat uski

yuuñ to kam kam thī mohabbat us kī

kam na thī phir bhī rifāqat us kī

saare dukh bhuul ke hañs letā thā

ye bhī thī ek karāmat us kī

uljhaneñ aur bhī thiiñ us ke liye

ek maiñ bhī thā musībat us kī

pahle bhī piine ko jī kartā thā

mil hī jaatī thī ijāzat us kī

ḳhvāb meñ jaise chalā kartā huuñ

dekhtā rahtā huuñ sūrat us kī

naam rahtā hai zabāñ par us kā

ghar meñ rahtī hai zarūrat us kī

us kī aadat thī sharārat karnā

kaash ye bhī ho sharārat us kī

phailte baḌhte hue bistar meñ

DhūñDhtā rahtā huuñ qurbat us kī

ek bosīda sā ghar chhoḌ ga.ī

le ga.ī saath vo jannat us kī

yun to kam kam thi mohabbat us ki

kam na thi phir bhi rifaqat us ki

sare dukh bhul ke hans leta tha

ye bhi thi ek karamat us ki

uljhanen aur bhi thin us ke liye

ek main bhi tha musibat us ki

pahle bhi pine ko ji karta tha

mil hi jati thi ijazat us ki

KHwab mein jaise chala karta hun

dekhta rahta hun surat us ki

nam rahta hai zaban par us ka

ghar mein rahti hai zarurat us ki

us ki aadat thi shararat karna

kash ye bhi ho shararat us ki

phailte baDhte hue bistar mein

DhunDhta rahta hun qurbat us ki

ek bosida sa ghar chhoD gai

le gai sath wo jannat us ki