yun to likhne ke liye kya nahin likkha maine

yuuñ to likhne ke liye kyā nahīñ likkhā maiñ ne

phir bhī jitnā tujhe chāhā nahīñ likkhā maiñ ne

ye to ik lahr meñ kuchh rañg jhalak aa.e haiñ

abhī mujh meñ hai jo dariyā nahīñ likkhā maiñ ne

mere har lafz kī vahshat meñ hai ik umr kā ishq

ye koī khel-tamāshā nahīñ likkhā maiñ ne

likhne vaalā maiñ ajab huuñ ki agar koī ḳhayāl

apnī hairat se na niklā nahīñ likkhā maiñ ne

merī nazroñ se jo ik baar na pahuñchā tujh tak

phir vo maktūb dobāra nahīñ likkhā maiñ ne

merī sachchā.ī har ik lafz se lau detī hai

jaise sab likhte haiñ vaisā nahīñ likkhā maiñ ne

yun to likhne ke liye kya nahin likkha main ne

phir bhi jitna tujhe chaha nahin likkha main ne

ye to ek lahr mein kuchh rang jhalak aae hain

abhi mujh mein hai jo dariya nahin likkha main ne

mere har lafz ki wahshat mein hai ek umr ka ishq

ye koi khel-tamasha nahin likkha main ne

likhne wala main ajab hun ki agar koi KHayal

apni hairat se na nikla nahin likkha main ne

meri nazron se jo ek bar na pahuncha tujh tak

phir wo maktub dobara nahin likkha main ne

meri sachchai har ek lafz se lau deti hai

jaise sab likhte hain waisa nahin likkha main ne