yun tumhaare na-tawan-e-shauq manzil bhar chale

yuuñ tumhāre nā-tavān-e-shauq manzil bhar chale

khaa.ī Thokar gir paḌe gir kar uThe uTh kar chale

chhoḌ kar bīmār ko ye kyā qayāmat kar chale

dam nikalne bhī na paayā aap apne ghar chale

ho gayā sayyād barham ai asīrān-e-qafas

band ab ye nāla-o-fariyād varna par chale

kis tarah tai kī hai manzil ishq kī ham ne na pūchh

thak ga.e jab paañv terā naam le le kar chale

aa rahe haiñ ashk āñkhoñ meñ ab ai saaqī na chheḌ

bas chhalakne kī kasar baaqī hai sāġhar bhar chale

jab bhī ḳhālī haath the aur ab bhī ḳhālī haath haiñ

le ke ham duniyā meñ kyā aa.e the kyā le kar chale

husn ko ġhamgīn dekhe ishq ye mumkin nahīñ

rok le ai sham.a aañsū ab patiñge mar chale

is taraf bhī ik nazar ham bhī khaḌe haiñ der se

māñgne vaale tumhāre dar se jholī bhar chale

ai 'qamar' shab ḳhatm hone ko hai chhoḌo intizār

sāhil-e-shab se sitāre bhī kināra kar chale

yun tumhaare na-tawan-e-shauq manzil bhar chale

khai Thokar gir paDe gir kar uThe uTh kar chale

chhoD kar bimar ko ye kya qayamat kar chale

dam nikalne bhi na paya aap apne ghar chale

ho gaya sayyaad barham ai asiran-e-qafas

band ab ye nala-o-fariyaad warna par chale

kis tarah tai ki hai manzil ishq ki hum ne na puchh

thak gae jab panw tera nam le le kar chale

aa rahe hain ashk aankhon mein ab ai saqi na chheD

bas chhalakne ki kasar baqi hai saghar bhar chale

jab bhi KHali hath the aur ab bhi KHali hath hain

le ke hum duniya mein kya aae the kya le kar chale

husn ko ghamgin dekhe ishq ye mumkin nahin

rok le ai shama aansu ab patinge mar chale

is taraf bhi ek nazar hum bhi khaDe hain der se

mangne wale tumhaare dar se jholi bhar chale

ai 'qamar' shab KHatm hone ko hai chhoDo intizar

sahil-e-shab se sitare bhi kinara kar chale