yunhi be-sabab na phira karo koi sham ghar mein raha karo

yūñhī be-sabab na phirā karo koī shaam ghar meñ rahā karo

vo ġhazal kī sachchī kitāb hai use chupke chupke paḌhā karo

koī haath bhī na milā.egā jo gale miloge tapāk se

ye na.e mizāj kā shahr hai zarā fāsle se milā karo

abhī raah meñ ka.ī moḌ haiñ koī aa.egā koī jā.egā

tumheñ jis ne dil se bhulā diyā use bhūlne kī du'ā karo

mujhe ishtihār sī lagtī haiñ ye mohabbatoñ kī kahāniyāñ

jo kahā nahīñ vo sunā karo jo sunā nahīñ vo kahā karo

kabhī husn-e-parda-nashīñ bhī ho zarā 'āshiqāna libās meñ

jo maiñ ban-sañvar ke kahīñ chalūñ mire saath tum bhī chalā karo

nahīñ be-hijāb vo chāñd sā ki nazar kā koī asar na ho

use itnī garmī-e-shauq se baḌī der tak na takā karo

ye ḳhizāñ kī zard sī shaal meñ jo udaas peḌ ke paas hai

ye tumhāre ghar kī bahār hai ise āñsuoñ se harā karo

yunhi be-sabab na phira karo koi sham ghar mein raha karo

wo ghazal ki sachchi kitab hai use chupke chupke paDha karo

koi hath bhi na milaega jo gale miloge tapak se

ye nae mizaj ka shahr hai zara fasle se mila karo

abhi rah mein kai moD hain koi aaega koi jaega

tumhein jis ne dil se bhula diya use bhulne ki du'a karo

mujhe ishtihaar si lagti hain ye mohabbaton ki kahaniyan

jo kaha nahin wo suna karo jo suna nahin wo kaha karo

kabhi husn-e-parda-nashin bhi ho zara 'ashiqana libas mein

jo main ban-sanwar ke kahin chalun mere sath tum bhi chala karo

nahin be-hijab wo chand sa ki nazar ka koi asar na ho

use itni garmi-e-shauq se baDi der tak na taka karo

ye KHizan ki zard si shaal mein jo udas peD ke pas hai

ye tumhaare ghar ki bahaar hai ise aansuon se hara karo