yunhi dukh ho jawenge kam shahzade

yūñhī dukh ho jāveñge kam shahzāde

aa jā sukh ke ḳhvāb buneñ ham shahzāde

apne hosh gañvā baiThī huuñ phir se aaj

soch rahī huuñ tujh ko har dam shahzāde

shahzādī ke ḳhvāb azaab na kar jaanā

ho jāveñgī āñkheñ pur-nam shahzāde

merī ruuh meñ terī yaad utartī hai

haule haule maddham maddham shahzāde

aisā saḳht takallum āḳhir kyoñ bolo

kyoñ rahte ho barham barham shahzāde

kab tak tanhā tanhā TūTeñ bikhreñge

ruuh meñ ruuh ko hone de zam shahzāde

shahzāde kuchh aur na māñge shahzādī

nikle terī bāñhoñ meñ dam shahzāde

rafta rafta ho ga.e āḳhir tere naam

merā jīvan mere mausam shahzāde

tujh se hī mānūs huā so tū jaane

jag kyā jaane dil kā aalam shahzāde

aañsū tujh ko DhūñDeñ haiñ dīvāna-vār

shahzādī kī āñkheñ haiñ nam shahzāde

kab tak tanhā chuntī jaa.e zaḳhm 'rabāb'

rakh mīThe lafzoñ ke marham shahzāde

yunhi dukh ho jawenge kam shahzade

aa ja sukh ke KHwab bunen hum shahzade

apne hosh ganwa baiThi hun phir se aaj

soch rahi hun tujh ko har dam shahzade

shahzadi ke KHwab azab na kar jaana

ho jawengi aankhen pur-nam shahzade

meri ruh mein teri yaad utarti hai

haule haule maddham maddham shahzade

aisa saKHt takallum aaKHir kyon bolo

kyon rahte ho barham barham shahzade

kab tak tanha tanha TuTen bikhrenge

ruh mein ruh ko hone de zam shahzade

shahzade kuchh aur na mange shahzadi

nikle teri banhon mein dam shahzade

rafta rafta ho gae aaKHir tere nam

mera jiwan mere mausam shahzade

tujh se hi manus hua so tu jaane

jag kya jaane dil ka aalam shahzade

aansu tujh ko DhunDen hain diwana-war

shahzadi ki aankhen hain nam shahzade

kab tak tanha chunti jae zaKHm 'rabab'

rakh miThe lafzon ke marham shahzade