zahid is rah na aa mast hain mai-KHwar kai

zāhid is raah na aa mast haiñ mai-ḳhvār ka.ī

abhī yaañ chhīn liye jubba-o-dastār ka.ī

sañg-dil kuuñ na kisī kī huī afsos ḳhabar

mar ga.e sar kuuñ paTak kar pas-e-dīvār ka.ī

nā-tavāñ mujh sā bhalā kaun hai insāf to kar

chashm-e-fattāñ ke tire garche haiñ bīmār ka.ī

dil kī betābī se aur chashm kī be-ḳhvābī se

nazar aane lage ab ishq ke āsār ka.ī

juuñ hī vo hosh-rubā aa ke numūdār huā

naqsh-e-dīvār hue tālib-e-dīdār ka.ī

abrū-o-chashm-o-nigāh-o-mizha har ik ḳhūñ-ḳhvār

ek dil hai mirā tis par haiñ dil-āzār ka.ī

ai masīhā-e-zamāñ dekh Tuk aa kar ahvāl

ki tirī chashm ke yaañ marte haiñ bīmār ka.ī

khīñch mat zor se shāne ko tū ai mashshāta

dil haiñ us zulf ke bāloñ meñ giraftār ka.ī

kaf-e-pā haiñ tire sahrā kī nishānī 'bedār'

mar gayā to bhī phaphūloñ meñ rahe ḳhaar ka.ī

zahid is rah na aa mast hain mai-KHwar kai

abhi yan chhin liye jubba-o-dastar kai

sang-dil kun na kisi ki hui afsos KHabar

mar gae sar kun paTak kar pas-e-diwar kai

na-tawan mujh sa bhala kaun hai insaf to kar

chashm-e-fattan ke tere garche hain bimar kai

dil ki betabi se aur chashm ki be-KHwabi se

nazar aane lage ab ishq ke aasar kai

jun hi wo hosh-ruba aa ke numudar hua

naqsh-e-diwar hue talib-e-didar kai

abru-o-chashm-o-nigah-o-mizha har ek KHun-KHwar

ek dil hai mera tis par hain dil-azar kai

ai masiha-e-zaman dekh Tuk aa kar ahwal

ki teri chashm ke yan marte hain bimar kai

khinch mat zor se shane ko tu ai mashshata

dil hain us zulf ke baalon mein giraftar kai

kaf-e-pa hain tere sahra ki nishani 'bedar'

mar gaya to bhi phaphulon mein rahe KHar kai