zahid na kah buri ki ye mastane aadmi hain

zāhid na kah burī ki ye mastāne aadmī haiñ

tujh ko lipaT paḌeñge dīvāne aadmī haiñ

ġhairoñ kī dostī par kyuuñ e'tibār kiije

ye dushmanī kareñge begāne aadmī haiñ

jo aadmī pe guzrī vo ik sivā tumhāre

kyā jī lagā ke sunte afsāne aadmī haiñ

kyā jur.ateñ jo ham ko darbāñ tumhārā Toke

kah do ki ye to jāne-pahchāne aadmī haiñ

mai buuñd bhar pilā kar kyā hañs rahā hai saaqī

bhar bhar ke piite āḳhir paimāne aadmī haiñ

tum ne hamāre dil meñ ghar kar liyā to kyā hai

ābād karte āḳhir vīrāne aadmī haiñ

nāseh se koī kah de kiije kalām aisā

hazrat ko tā ki koī ye jaane aadmī haiñ

jab dāvar-e-qayāmat pūchhegā tum pe rakh kar

kah deñge saaf ham to begāne aadmī haiñ

maiñ vo bashar ki mujh se har aadmī ko nafrat

tum sham.a vo ki tum par parvāne aadmī haiñ

mahfil bharī huī hai saudā.iyoñ se us kī

us ġhairat-e-parī par dīvāne aadmī haiñ

shābāsh 'dāġh' tujh ko kyā teġh-e-ishq khaa.ī

jī karte haiñ vahī jo mardāne aadmī haiñ

zahid na kah buri ki ye mastane aadmi hain

tujh ko lipaT paDenge diwane aadmi hain

ghairon ki dosti par kyun e'tibar kije

ye dushmani karenge begane aadmi hain

jo aadmi pe guzri wo ek siwa tumhaare

kya ji laga ke sunte afsane aadmi hain

kya juraten jo hum ko darban tumhaara Toke

kah do ki ye to jaane-pahchane aadmi hain

mai bund bhar pila kar kya hans raha hai saqi

bhar bhar ke pite aaKHir paimane aadmi hain

tum ne hamare dil mein ghar kar liya to kya hai

aabaad karte aaKHir virane aadmi hain

naseh se koi kah de kije kalam aisa

hazrat ko ta ki koi ye jaane aadmi hain

jab dawar-e-qayamat puchhega tum pe rakh kar

kah denge saf hum to begane aadmi hain

main wo bashar ki mujh se har aadmi ko nafrat

tum shama wo ki tum par parwane aadmi hain

mahfil bhari hui hai saudaiyon se us ki

us ghairat-e-pari par diwane aadmi hain

shabash 'dagh' tujh ko kya tegh-e-ishq khai

ji karte hain wahi jo mardane aadmi hain