zat ki diwar bichon-bich ek dar wa hua

zaat kī dīvār bīchoñ-bīch ik dar vā huā

āḳhirī lamhoñ meñ gar ho bhī gayā to kyā huā

raqs meñ mad.hosh ġhauġhā-e-surūd-o-lai meñ gum

kaun hai ye shiddat-e-āzār se hañstā huā

terī merī aañkh kī miTTī hamesha nam rahe

ho abad se bhī pare ruḳhsat kā pul phailā huā

ba.ad az yak saa.at ḳhāmosh mātam ḳhatm shud

kyuuñ kisī ke sog meñ ruktā zamāñ chaltā huā

mere shānoñ par ridā-e-ābrū-e-ishq hai

bārish-e-nāmūs-e-ulfat meñ hai dil bhīgā huā

vo rukā ruk kar muḌā muḌ kar mirī jānib jhukā

umr kā dariyā vahīñ tham sā gayā bahtā huā

merī peshānī pe daa.eñ haath kī añgusht se

ek ḳhush-qāmat ne apnā naam hai likkhā huā

zat ki diwar bichon-bich ek dar wa hua

aaKHiri lamhon mein gar ho bhi gaya to kya hua

raqs mein madhosh ghaugha-e-surud-o-lai mein gum

kaun hai ye shiddat-e-azar se hansta hua

teri meri aankh ki miTTi hamesha nam rahe

ho abad se bhi pare ruKHsat ka pul phaila hua

baad az yak saat KHamosh matam KHatm shud

kyun kisi ke sog mein rukta zaman chalta hua

mere shanon par rida-e-abru-e-ishq hai

barish-e-namus-e-ulfat mein hai dil bhiga hua

wo ruka ruk kar muDa muD kar meri jaanib jhuka

umr ka dariya wahin tham sa gaya bahta hua

meri peshani pe daen hath ki angusht se

ek KHush-qamat ne apna nam hai likkha hua