zaban kuchh aur kahti hai nazar kuchh aur kahti hai

zabāñ kuchh aur kahtī hai nazar kuchh aur kahtī hai

ba-zāhir ye tavajjoh chāra-gar kuchh aur kahtī hai

zamāna naġhma-pairā.ī kā jab aa.egā aa.egā

abhī to shiddat-e-soz-e-jigar kuchh aur kahtī hai

bhalā aap aur iḳhfā-e-haqīqat ai ma.āz-allāh

zabān-e-ḳhalq jhūTī hai agar kuchh aur kahtī hai

koī kis tarah dhokā khaa.e is ātish-bayānī kā

udāsī terī ai sham-e-sahar kuchh aur kahtī hai

isī tashḳhīs par itrā rahā thā ek muddat se

masīhā dekh nabz-e-bahr-o-bar kuchh aur kahtī hai

tirī azmat kā munkir thā na huuñ ai rahbar-e-kāmil

ab is ko kyā karūñ maiñ rahguzar kuchh aur kahtī hai

bharam 'yāqūb' khulne hī ko hai ab āsmānoñ kā

zamīñ se gardish-e-shams-o-qamar kuchh aur kahtī hai

zaban kuchh aur kahti hai nazar kuchh aur kahti hai

ba-zahir ye tawajjoh chaara-gar kuchh aur kahti hai

zamana naghma-pairai ka jab aaega aaega

abhi to shiddat-e-soz-e-jigar kuchh aur kahti hai

bhala aap aur iKHfa-e-haqiqat ai maaz-allah

zaban-e-KHalq jhuTi hai agar kuchh aur kahti hai

koi kis tarah dhoka khae is aatish-bayani ka

udasi teri ai sham-e-sahar kuchh aur kahti hai

isi tashKHis par itra raha tha ek muddat se

masiha dekh nabz-e-bahr-o-bar kuchh aur kahti hai

teri azmat ka munkir tha na hun ai rahbar-e-kaamil

ab is ko kya karun main rahguzar kuchh aur kahti hai

bharam 'yaqub' khulne hi ko hai ab aasmanon ka

zamin se gardish-e-shams-o-qamar kuchh aur kahti hai