zabt-e-fughan se aa gai honTon pe jaan talak

zabt-e-fuġhāñ se aa ga.ī hoñToñ pe jaañ talak

dekhoge mere sabr kī tāqat kahāñ talak

ġhaflat-shi.ārahā ke taġhāful kahāñ talak

jiitā rahegā kaun tire imtihāñ talak

vo merī aarzū thī jo ghuT ghuT ke rah ga.ī

vo dil kī baat thī jo na aa.ī zabāñ talak

gulshan meñ aa ke tum to ajab haal kar ga.e

bhūle hue haiñ murġh-e-chaman āshiyāñ talak

pāmāl karne ḳhaak uḌāne se fā.eda

aise chalo ki merā miTā do nishāñ talak

yaad aa.e chhuT ke daam se sayyād ke karam

pahuñchā do mujh ko koī mire mehrbāñ talak

'shola' ke ba.ad ḳhatm hai ījād-e-tarz-e-nau

kuchh lutf thā suḳhan kā usī ḳhush-bayāñ talak

zabt-e-fughan se aa gai honTon pe jaan talak

dekhoge mere sabr ki taqat kahan talak

ghaflat-shiaraha ke taghaful kahan talak

jita rahega kaun tere imtihan talak

wo meri aarzu thi jo ghuT ghuT ke rah gai

wo dil ki baat thi jo na aai zaban talak

gulshan mein aa ke tum to ajab haal kar gae

bhule hue hain murgh-e-chaman aashiyan talak

pamal karne KHak uDane se faeda

aise chalo ki mera miTa do nishan talak

yaad aae chhuT ke dam se sayyaad ke karam

pahuncha do mujh ko koi mere mehrban talak

'shola' ke baad KHatm hai ijad-e-tarz-e-nau

kuchh lutf tha suKHan ka usi KHush-bayan talak