zabt kar aah bar bar na kar

zabt kar aah baar baar na kar

ġham-e-ulfat ko sharmsār na kar

jis ko ḳhud apnā e.atibār na ho

aise insāñ kā e.atibār na kar

us ke fazl-o-karam pe rakh nazreñ

apne sajdoñ kā e.atibār na kar

baaġh ujaḌne kā ġham hī kyā kam hai

jaane bhī de ġham-e-bahār na kar

log tujh ko haqīr samjheñge

had se zaa.id bhī inkisār na kar

vaqt se fā.eda uThā lekin

vaqt kā koī e.atibār na kar

lutf uThā bas nigāh-e-avval se

har nazar ko gunāhgār na kar

jis se fitne bapā hoñ duniyā meñ

aise ġhāfil ko hoshiyār na kar

'qadr' ko tū ne dī hai jab izzat

ai ḳhudā us ko be-vaqār na kar

zabt kar aah bar bar na kar

gham-e-ulfat ko sharmsar na kar

jis ko KHud apna eatibar na ho

aise insan ka eatibar na kar

us ke fazl-o-karam pe rakh nazren

apne sajdon ka eatibar na kar

bagh ujaDne ka gham hi kya kam hai

jaane bhi de gham-e-bahaar na kar

log tujh ko haqir samjhenge

had se zaid bhi inkisar na kar

waqt se faeda uTha lekin

waqt ka koi eatibar na kar

lutf uTha bas nigah-e-awwal se

har nazar ko gunahgar na kar

jis se fitne bapa hon duniya mein

aise ghafil ko hoshiyar na kar

'qadr' ko tu ne di hai jab izzat

ai KHuda us ko be-waqar na kar