zabt ki koshish hai jaan-e-na-tawan mushkil mein hai

zabt kī koshish hai jān-e-nā-tavāñ mushkil meñ hai

kyuuñ ayaañ ho aañkh se vo ġham jo pinhāñ dil meñ hai

jis se chāho pūchh lo tum mere soz-e-dil kā haal

sham.a bhī mahfil meñ hai parvāna bhī mahfil meñ hai

ishq-e-ġhārat-gar ne shah dī husn-e-āfat-ḳhez ko

shauq-e-bismil hī se kas-bal bāzū-e-qātil meñ hai

kuchh samajh kar hī huā huuñ mauj-e-dariyā kā harīf

varna maiñ bhī jāntā huuñ āfiyat sāhil meñ hai

ḳhud tujhe aa jā.egā āshiq-navāzī kā ḳhayāl

terā rahrav kyuuñ ḳhayāl-e-dūrī-e-manzil meñ hai

mudda.ā-e-ishq merā kuchh nahīñ juz zauq-e-ishq

husn ko hairat ki ye kis sa.ī-e-be-hāsil meñ hai

apnī shān-e-be-niyāzī par tumheñ kyā kyā haiñ naaz

kaash tum us shauq ko jaano jo mere dil meñ hai

zabt ki koshish hai jaan-e-na-tawan mushkil mein hai

kyun ayan ho aankh se wo gham jo pinhan dil mein hai

jis se chaho puchh lo tum mere soz-e-dil ka haal

shama bhi mahfil mein hai parwana bhi mahfil mein hai

ishq-e-ghaarat-gar ne shah di husn-e-afat-KHez ko

shauq-e-bismil hi se kas-bal bazu-e-qatil mein hai

kuchh samajh kar hi hua hun mauj-e-dariya ka harif

warna main bhi jaanta hun aafiyat sahil mein hai

KHud tujhe aa jaega aashiq-nawazi ka KHayal

tera rahraw kyun KHayal-e-duri-e-manzil mein hai

muddaa-e-ishq mera kuchh nahin juz zauq-e-ishq

husn ko hairat ki ye kis sai-e-be-hasil mein hai

apni shan-e-be-niyazi par tumhein kya kya hain naz

kash tum us shauq ko jaano jo mere dil mein hai