zabt se kaam le aahon mein asar hone tak

zabt se kaam le aahoñ meñ asar hone tak

sham.a har rang meñ jaltī hai sahar hone tak

vo nasheman bhī to sayyād mirā chhūT gayā

ham bachā.e the jise nazr-e-sharar hone tak

tum na aa.e to shab-e-hijr sitāre chun kar

ham ne palkoñ meñ sajā.e the sahar hone tak

silsila girya-e-paiham kā na chhūTe yā-rab

us ke dāman kā mire ashkoñ se tar hone tak

apnā maslak hai yahī kār-gah-e-razm-e-hayāt

kashmakash jaarī rahe ma.arka sar hone tak

muntazir aap raheñ ham to chale ai 'hamdam'

naḳhl-e-gulzār-e-tamanna meñ samar hone tak

zabt se kaam le aahon mein asar hone tak

shama har rang mein jalti hai sahar hone tak

wo nasheman bhi to sayyaad mera chhuT gaya

hum bachae the jise nazr-e-sharar hone tak

tum na aae to shab-e-hijr sitare chun kar

hum ne palkon mein sajae the sahar hone tak

silsila girya-e-paiham ka na chhuTe ya-rab

us ke daman ka mere ashkon se tar hone tak

apna maslak hai yahi kar-gah-e-razm-e-hayat

kashmakash jari rahe marka sar hone tak

muntazir aap rahen hum to chale ai 'hamdam'

naKHl-e-gulzar-e-tamanna mein samar hone tak