zabt se na-ashna hum sabr se begana hum

zabt se nā-āshnā ham sabr se begāna ham

kyuuñ kisī se māñgte jaa.eñ charāġh-e-ḳhāna ham

ḳhud hī sāz-e-be-ḳhudi ko chheḌ dete haiñ kabhī

ḳhud hī sunte haiñ hadīs-e-saġhar-o-paimana ham

daf.atan sāz-e-do-ālam be-sadā ho jā.egā

kahte kahte ruk ga.e jis din tirā afsāna ham

sham-e-aivān-e-haram ho yā charāġh-e-tāq-e-dair

ham ko donoñ se ta.alluq hai ki haiñ parvāna ham

dil jalā phir ḳhud jale phir saarī duniyā jal uThī

soz laa.e the ba-miqdār-e-par-e-parvāna ham

jab hameñ dīvāna banñā hai to kaisī maslahat

maslahat ko bhī banā leñge tirā dīvāna ham

bas-ki hai 'sīmāb' be-mehrī yagānoñ kā shi.ār

haiñ rahīn-e-iltifāt-e-ḳhātir-e-begāna ham

zabt se na-ashna hum sabr se begana hum

kyun kisi se mangte jaen charagh-e-KHana hum

KHud hi saz-e-be-KHudi ko chheD dete hain kabhi

KHud hi sunte hain hadis-e-saghar-o-paimana hum

dafatan saz-e-do-alam be-sada ho jaega

kahte kahte ruk gae jis din tera afsana hum

sham-e-aiwan-e-haram ho ya charagh-e-taq-e-dair

hum ko donon se talluq hai ki hain parwana hum

dil jala phir KHud jale phir sari duniya jal uThi

soz lae the ba-miqdar-e-par-e-parwana hum

jab hamein diwana banna hai to kaisi maslahat

maslahat ko bhi bana lenge tera diwana hum

bas-ki hai 'simab' be-mehri yaganon ka shiar

hain rahin-e-iltifat-e-KHatir-e-begana hum