zabun-o-KHwar hui hai meri jibillat bhi

zabūn-o-ḳhvār huī hai mirī jibillat bhī

mire nasīb-o-virāsat meñ se imāmat bhī

ajab hirās meñ thā mere mausamoñ se ġhanīm

ki de rahā thā use bhāgne kī mohlat bhī

vo jab bhī aayā kam-o-besh mujh pe vaar gayā

mujhe ye shauq ki laatā kabhī zarūrat bhī

maiñ apne zahr se vāqif huuñ vo samajhtā nahīñ

hai mere kīsa-e-sad-kām meñ sharāfat bhī

samajh rahe the maiñ tanhā huuñ be-basīrat log

pas-e-ġhubār chalī aa rahī thī ḳhilqat bhī

agar salīqe se koī giraft meñ laa.e

maiñ oḌh letā huuñ aksar ridā-e-tohmat bhī

maiñ niiñd meñ thā ki sargoshiyoñ ke raqs meñ thā

udhar thī nāqa-e-umr-r-ravāñ ko ujlat bhī

ai shahsavār mujhe bādshah banā ke to dekh

maiñ kaaT Dālūñgā sar-rishta-e-baġhāvat bhī

usī ne rakh diyā mujh ko sameT kar 'haqqī'

vo jis ke naam se mujh ko milī thī shohrat bhī

zabun-o-KHwar hui hai meri jibillat bhi

mere nasib-o-wirasat mein se imamat bhi

ajab hiras mein tha mere mausamon se ghanim

ki de raha tha use bhagne ki mohlat bhi

wo jab bhi aaya kam-o-besh mujh pe war gaya

mujhe ye shauq ki lata kabhi zarurat bhi

main apne zahr se waqif hun wo samajhta nahin

hai mere kisa-e-sad-kaam mein sharafat bhi

samajh rahe the main tanha hun be-basirat log

pas-e-ghubar chali aa rahi thi KHilqat bhi

agar saliqe se koi giraft mein lae

main oDh leta hun aksar rida-e-tohmat bhi

main nind mein tha ki sargoshiyon ke raqs mein tha

udhar thi naqa-e-umr-r-rawan ko ujlat bhi

ai shahsawar mujhe baadshah bana ke to dekh

main kaT Dalunga sar-rishta-e-baghawat bhi

usi ne rakh diya mujh ko sameT kar 'haqqi'

wo jis ke nam se mujh ko mili thi shohrat bhi