zahe-nasib ki unki koi KHabar aai

zahe-nasīb ki un kī koī ḳhabar aa.ī

añdherā duur huā raushnī nazar aa.ī

vo ek tum jo kabhī vaqt par nahīñ aa.e

tumhārī yaad har ik shaam vaqt par aa.ī

ḳhayāl-e-duniyā-o-uqbā ġham-e-vajūd-o-adam

ka.ī azaab liye umr-e-muḳhtasar aa.ī

sunī ga.ī hai vahāñ par har ek kī fariyād

bas ek apnī sadā thī jo lauT kar aa.ī

koī na aisā thā jo apne saath ho letā

bas ek dost thī tanhā.ī apne ghar aa.ī

jahāñ ḳhud apne hī saa.e ne saath chhoḌ diyā

rah-e-hayāt meñ aisī bhī rahguzar aa.ī

gunāh kar ke bhī vo pārsā rahā 'nādim'

tamām tohmat-o-rusvā.ī mere sar aa.ī

zahe-nasib ki un ki koi KHabar aai

andhera dur hua raushni nazar aai

wo ek tum jo kabhi waqt par nahin aae

tumhaari yaad har ek sham waqt par aai

KHayal-e-duniya-o-uqba gham-e-wajud-o-adam

kai azab liye umr-e-muKHtasar aai

suni gai hai wahan par har ek ki fariyaad

bas ek apni sada thi jo lauT kar aai

koi na aisa tha jo apne sath ho leta

bas ek dost thi tanhai apne ghar aai

jahan KHud apne hi sae ne sath chhoD diya

rah-e-hayat mein aisi bhi rahguzar aai

gunah kar ke bhi wo parsa raha 'nadim'

tamam tohmat-o-ruswai mere sar aai